🛑 कोलंबीचे हणमंत कोकुर्ले ठरले ‘आदर्श संगणक परिचालक’

🛑 कोलंबीचे हणमंत कोकुर्ले ठरले ‘आदर्श संगणक परिचालक’

शिवगर्जना न्यूज,

नायगाव : ग्रामीण भागातील

नागरिकांना आपले सरकार सेवा केंद्राच्या माध्यमातून तत्पर, पारदर्शक आणि गुणवत्तापूर्ण डिजिटल सेवा उपलब्ध करून देत प्रशासनाच्या डिजिटल वाटचालीत उल्लेखनीय योगदान देणारे ग्रामपंचायत कोलंबीचे संगणक परिचालक हणमंत आत्माराम कोकुर्ले यांना सन २०२५-२६ या वर्षाचा ‘आदर्श संगणक परिचालक (उत्कृष्ट)’ पुरस्कार प्रदान करून गौरविण्यात आले. स्वातंत्र्यदिनाचे औचित्य साधून नायगाव पंचायत समिती प्रशासनाच्या वतीने आयोजित करण्यात आलेल्या भव्य समारंभात हा सन्मान करण्यात आला.

नायगाव पंचायत समितीचे गटविकास अधिकारी पि.एन. वानखेडे, तहसीलदार धम्मप्रिया गायकवाड तथा विस्तार अधिकारी (पंचायत) पि.एस. जाधव यांच्या हस्ते हणमंत कोकुर्ले यांना सन्मानचिन्ह, प्रशस्तीपत्र व पुष्पगुच्छ देऊन गौरविण्यात आले.

ग्रामस्थांच्या डिजिटल सेवेसाठी सदैव तत्पर

हणमंत कोकुर्ले यांनी ग्रामपंचायत कोलंबी येथे कार्यरत असताना जबाबदारी, प्रामाणिकपणा आणि सेवाभावाची अनोखी सांगड घालत नागरिकांना विविध शासकीय डिजिटल सेवा प्रभावीपणे उपलब्ध करून दिल्या. केंद्र व राज्य शासनाच्या विविध कल्याणकारी योजनांची माहिती नागरिकांपर्यंत पोहोचविण्यासोबतच पात्र लाभार्थ्यांना योजनांचा लाभ मिळवून देण्यासाठी त्यांनी सातत्याने पुढाकार घेतला.

ई-ग्रामस्वराज, घरकुल योजना, पीआरआय (PRI) ॲप, ई-टेंडरिंग, डिजिटल सातबारा यांसह विविध ई-प्रशासकीय कामे वेळेत व अचूकपणे पूर्ण करण्यामध्ये त्यांनी विशेष योगदान दिले. जन्म-मृत्यू दाखले, रहिवासी दाखले, उत्पन्न दाखले आदी विविध आवश्यक प्रमाणपत्रे नागरिकांना विनाअडथळा व तातडीने उपलब्ध करून देत त्यांनी ग्रामपंचायतीच्या डिजिटल सेवा व्यवस्थेला अधिक गतिमान केले.

‘मुख्यमंत्री समृद्ध पंचायत अभियानात’ मोलाचे योगदान

ग्रामपंचायत कोलंबीच्या विकासाच्या दृष्टीने महत्त्वपूर्ण ठरलेल्या मुख्यमंत्री समृद्ध पंचायत अभियानातही हणमंत कोकुर्ले यांनी उल्लेखनीय भूमिका बजावली. त्यांच्या कार्यक्षमतेमुळे आणि सातत्यपूर्ण प्रयत्नांमुळे ग्रामपंचायत कोलंबीला तालुकास्तरावर प्रथम क्रमांक मिळवून देण्यात मोलाचे योगदान मिळाले. डिजिटल सेवा, प्रशासकीय कामकाजातील अचूकता, नागरिकांशी सुसंवाद आणि शासकीय योजनांची प्रभावी अंमलबजावणी या विविध बाबींची दखल घेत तालुका प्रशासनाने त्यांची ‘आदर्श संगणक परिचालक’ पुरस्कारासाठी निवड केली.

“हा पुरस्कार माझ्या एकट्याचा नसून सर्वांच्या सहकार्याचे फळ”

पुरस्कार स्वीकारल्यानंतर मनोगत व्यक्त करताना हणमंत कोकुर्ले म्हणाले, “ग्रामीण जनतेची डिजिटल सेवेच्या माध्यमातून सेवा करताना केलेल्या कामाची पावती म्हणून आज मिळालेला ‘आदर्श संगणक परिचालक’ पुरस्कार मी स्वीकारतो. हा सन्मान केवळ माझा नसून माझ्यासोबत काम करणारे वरिष्ठ अधिकारी प्रकाश जाधव, गणेश टोणगे (विस्तार अधिकारी, पंचायत समिती नायगाव),

सर्व अधिकारी, सहकारी, संगणक परिचालक, तसेच कोलंबी ग्रामस्थांच्या सहकार्याचे हे फळ आहे. भविष्यातही नागरिकांना पारदर्शक, तत्पर व दर्जेदार सेवा देण्यासाठी मी सदैव कटिबद्ध राहीन.”

गौरव सोहळ्यास मान्यवरांची उपस्थिती या गौरव सोहळ्यास सरपंच प्रतिनिधी शिवाजी पा. शिंदे, माजी सरपंच शिवदत्त पोतलवाड, अनिल बैस यांच्यासह विविध सामाजिक व राजकीय संस्थांचे पदाधिकारी, शासकीय अधिकारी-कर्मचारी, सहकारी संगणक परिचालक आणि ग्रामस्थ मोठ्या संख्येने उपस्थित होते.

ग्रामीण भागातील नागरिकांना शासनाच्या डिजिटल सेवांशी जोडत अत्यंत जबाबदारीने व सेवाभावाने काम करणाऱ्या हणमंत कोकुर्ले यांच्या कार्याची प्रशासनाने घेतलेली दखल ही निश्चितच कौतुकास्पद मानली जात आहे. त्यांच्या या सन्मानामुळे कोलंबी गावाच्या शिरपेचात मानाचा तुरा रोवला गेला असून, संपूर्ण पंचक्रोशीतून त्यांच्यावर अभिनंदनाचा वर्षाव होत आहे.

🔴मुख्य संपादक: श्री शहाजी वरखिंडे

मो. 9923072242