🛑 बिलोली आगाराला नवीन ‘राजमाता’ ‘शिवाई’ व इलेक्ट्रिक बसेस द्या — नगरसेविका सौ. अनुपमा गायकवाड

बिलोली आगाराला नवीन ‘राजमाता’, ‘शिवाई’ व इलेक्ट्रिक बसेस द्या; नगरसेविका सौ. अनुपमा गायकवाड यांची मागणी

शिवगर्जना न्यूज,

बिलोली (सिध्दार्थ कांबळे)

महाराष्ट्र-तेलंगणा सीमेवरील महत्त्वाचे आगार म्हणून ओळखल्या जाणाऱ्या बिलोली आगारात प्रवाशांची वाढती संख्या लक्षात घेता नवीन ‘राजमाता जिजाऊ’ ‘शिवाई’ तसेच इलेक्ट्रिक बसेस तातडीने उपलब्ध करून द्याव्यात तसेच विविध मागण्या बिलोली नगर परिषदेच्या नगरसेविका सौ. अनुपमा महेंद्र गायकवाड यांनी महाराष्ट्र राज्य मार्ग परिवहन महामंडळ नांदेडचे विभागीय नियंत्रक अभय देशमुख नांदेड यांच्याकडे निवेदनाद्वारे केली आहे.

विभागीय नियंत्रक यांना दिलेल्या निवेदनात सौ.गायकवाड त्यांनी नमूद केले आहे की, बिलोली आगारातून दररोज हजारो प्रवासी शिक्षण, नोकरी, व्यवसाय, शासकीय कामकाज, वैद्यकीय उपचार तसेच इतर कारणांसाठी प्रवास करतात. बिलोली आगाराच्या कार्यक्षेत्रात देगलूर, मुखेड, नायगाव, धर्माबादसह सीमा भागातील अनेक गावे येत असल्याने या भागातील नागरिकांचा राज्य परिवहन महामंडळाच्या बससेवेवर मोठ्या प्रमाणात अवलंबून राहावे लागते.

सध्या बिलोली आगारात एकूण ५४ बसेस उपलब्ध असून त्यापैकी केवळ ५ बीएस-६ प्रकारातील नवीन बसेस आहेत. उर्वरित बहुतांश बसेस जुन्या झाल्यामुळे त्या वारंवार नादुरुस्त होत आहेत. त्यामुळे बसफेऱ्या रद्द होणे, वेळापत्रक विस्कळीत होणे, प्रवाशांचा वेळ व आर्थिक नुकसान होणे, तसेच विद्यार्थी, महिला, ज्येष्ठ नागरिक, रुग्ण आणि नोकरदार वर्गाला मोठ्या अडचणींचा सामना करावा लागत असल्याचे त्यांनी निदर्शनास आणून दिले आहे.

राज्य शासनाने आणि महाराष्ट्र राज्य मार्ग परिवहन महामंडळाने प्रवाशांना आधुनिक, सुरक्षित व आरामदायी प्रवासासाठी ‘राजमाता जिजाऊ’, ‘शिवाई’ आणि इलेक्ट्रिक बससेवा सुरू केली आहे. देगलूर, हदगाव, मुखेड, भोकर यांसारख्या आगारांना नवीन बसेस उपलब्ध करून देण्यात आल्या आहेत. देगलूर आगाराला सहा इलेक्ट्रिक बसेसही देण्यात आल्या आहेत. मात्र, बिलोलीसारख्या महत्त्वाच्या आगाराला अद्याप या सुविधांपासून वंचित ठेवण्यात आल्यामुळे नागरिकांमध्ये तीव्र नाराजी व्यक्त होत असल्याचे निवेदनात म्हटले आहे.

याशिवाय, नांदेड–हैदराबाद मार्गावरील रात्री ०८:००,०९:०० आणि ११:०० वाजताच्या बस फेऱ्या बंद झाल्यामुळे बिलोली तालुक्यातील नागरिकांची मोठी गैरसोय होत आहे. सायंकाळी ०७:०० नंतर बिलोलीसाठी कोणतीही बस उपलब्ध नसल्याने विद्यार्थी, महिला, नोकरदार आणि रुग्णांना मोठा त्रास सहन करावा लागत असल्याचेही त्यांनी स्पष्ट केले आहे.

या पार्श्वभूमीवर बिलोली आगाराला किमान पाच ‘राजमाता जिजाऊ’ बसेस, पाच ‘शिवाई’ बसेस आणि इलेक्ट्रिक बसेस उपलब्ध करून द्याव्यात अशी मागणी सौ अनुपमा महेंद्र गायकवाड यांनी केली आहे. या मागणीस विभागीय नियंत्रक अभय देशमुख यांनी सकारात्मक प्रतिसाद देत लवकरच नवीन बसेस उपलब्ध करून देण्यासाठी वरिष्ठ स्तरावर पाठपुरावा करण्याचे आश्वासन दिले आहे.

बिलोली–हैदराबाद, बिलोली–पुणे, बिलोली–लातूर, बिलोली–कोल्हापूर, बिलोली–माहूर, बिलोली–चंद्रपूर या प्रमुख मार्गांवर नवीन बससेवा सुरू करण्यात यावी. तसेच नांदेड–हैदराबाद मार्गावर वाढत्या प्रवासी संख्येचा विचार करून अतिरिक्त बसफेऱ्या सुरू कराव्यात, अशी ठाम मागणी नगरसेविका सौ. अनुपमा महेंद्र गायकवाड यांनी निवेदनाद्वारे केली आहे.

या मागण्यांवर महाराष्ट्र राज्य मार्ग परिवहन महामंडळाने सकारात्मक निर्णय घेऊन बिलोली आगाराला आधुनिक बस सेवा उपलब्ध करून दिल्यास सीमा भागातील हजारो प्रवाशांना मोठा दिलासा मिळणार असून, सार्वजनिक वाहतूक अधिक सुरक्षित, वेगवान व आरामदायी होण्यास मदत होईल, अशी अपेक्षा नागरिकांकडून व्यक्त होत आहे.

🔴मुख्य संपादक: श्री शहाजी वरखिंडे

मो. 9923072242