🔴 दुःखावर मात करत पत्नीने घेतला नेत्रदानाचा महान निर्णय

🔴 पतीच्या निधनाच्या दुःखावर मात; पत्नीचा नेत्रदानाचा प्रेरणादायी निर्णय.

🎯 घुगराळा येथील गणेश गुंडेवाड यांच्या नेत्रदानातून दोघांना मिळणार दृष्टी.

🎯 नायगाव ग्रामीण रुग्णालयातील पहिले यशस्वी नेत्रदान; अवयवदानाबाबत समाजासमोर आदर्श.

शिवगर्जना न्यूज,

नायगाव प्रतिनिधी –

पतीच्या अकाली निधनाचे असह्य दुःख हृदयात दडवून समाजहिताचा विचार करणाऱ्या पत्नीने घेतलेला नेत्रदानाचा निर्णय नायगाव तालुक्यासाठी प्रेरणादायी ठरला आहे. घुगराळा येथील गणेश माधवराव गुंडेवाड (वय ३७) यांचे २३ जुलै रोजी सकाळी हृदयविकाराच्या तीव्र झटक्याने निधन झाले. या दुःखद प्रसंगात पत्नी सोनाली गणेश गुंडेवाड यांनी धैर्य दाखवत पतीचे नेत्रदान करण्याचा निर्णय घेतला. या दानामुळे दोन दृष्टिहीन व्यक्तींना नव्याने जग पाहण्याची संधी मिळणार असून, नायगाव ग्रामीण रुग्णालयातील हे पहिले यशस्वी नेत्रदान ठरले आहे.

छातीत तीव्र वेदना जाणवत असल्याने गणेश गुंडेवाड यांना नायगाव येथील ग्रामीण रुग्णालयात दाखल करण्यात आले होते. मात्र, वैद्यकीय अधिकाऱ्यांनी तपासणीनंतर त्यांना मृत घोषित केले. या अत्यंत वेदनादायी क्षणीही पत्नी सोनाली गुंडेवाड यांनी जगद्गुरु रामानंदाचार्य नरेंद्राचार्यजी सेवा समितीच्या कार्यकर्त्यांशी संपर्क साधून नेत्रदानाची इच्छा व्यक्त केली. कुटुंबीयांनीही या निर्णयाला तत्काळ संमती दिल्याने मानवतेचा अनोखा आदर्श घडला.

ग्रामीण रुग्णालय वैद्यकीय अधीक्षक डॉ. अपर्णा पुपलवाड यांच्या समन्वयातून डॉ. शंकरराव चव्हाण शासकीय वैद्यकीय महाविद्यालय, नांदेड येथील नेत्रदान विभागाशी संपर्क साधण्यात आला. कुंटूर पोलीस ठाण्याने आवश्यक कायदेशीर प्रक्रिया पूर्ण केल्यानंतर डॉ. अतुल राऊत यांच्या मार्गदर्शनाखाली डॉ. राहुल पांढरे यांनी यशस्वीरीत्या नेत्र संकलनाची प्रक्रिया पार पाडली. संकलित करण्यात आलेले दोन्ही नेत्र शासकीय नेत्रपेढीकडे सुपूर्द करण्यात आले असून त्याचा लाभ दोन दृष्टिहीन रुग्णांना होणार आहे.

या कार्यात पत्नी सोनाली गुंडेवाड, मुलगा वरद गुंडेवाड, संगीता वकलवाड, बालाजी बिचेवाड, बालाजी तुरटवाड, राजेश तुरटवाड, शंकर गलेवाड, सागरबाई गलेवाड, मोहन तुरटवाड यांच्यासह जगद्गुरु रामानंदाचार्य नरेंद्राचार्यजी सेवा समितीचे नांदेड जिल्हा सचिव किशनराव मुडकर, जनम प्रवचनकार गंगाधरराव कोकणे, जनम प्रवचनकार डॉ. दर्शनाताई राठोड, पत्रकार शेषेराव कंधारे, तालुकाध्यक्ष वसंत फुलारी, लक्ष्मण पुपलवाड, महिला जिल्हाध्यक्ष संगीता अडकिने, तालुका महिला अध्यक्षा गंगाबाई डाके, नगरसेवक शिवाजी कल्याण, रावसाहेब पत्के, सेवा समितीचे पदाधिकारी, वैद्यकीय अधिकारी, पोलीस प्रशासन आणि ग्रामस्थांनी मोलाचे सहकार्य केले.

दुःखाच्या क्षणी घेतलेला हा मानवतेचा निर्णय केवळ दोन व्यक्तींना दृष्टी देणारा नसून समाजात अवयवदानाविषयी सकारात्मक जनजागृती निर्माण करणारा ठरत असल्याची भावना उपस्थितांनी व्यक्त केली.

घुगराळा येथील नेत्रदानाचा निर्णय समाजासाठी प्रेरणादायी – डॉ. अपर्णा पुपलवाड

घुगराळा येथील गणेश माधवराव गुंडेवाड यांच्या निधनानंतर त्यांच्या पत्नी व कुटुंबीयांनी दाखविलेली सामाजिक बांधिलकी अत्यंत प्रेरणादायी आहे. नायगाव ग्रामीण रुग्णालयाच्या इतिहासातील हे पहिले यशस्वी नेत्रदान असून नांदेड जिल्ह्यासाठीही ही अभिमानाची बाब आहे. प्रत्येक नागरिकाने अवयवदानाचा संकल्प करून इतरांच्या जीवनात प्रकाश निर्माण करण्यासाठी पुढे यावे, असे आवाहन ग्रामीण रुग्णालयाच्या वैद्यकीय अधीक्षक डॉ. अपर्णा पुपलवाड यांनी केले.

समाजसेवेचा दीपस्तंभ ठरले संस्थान; रक्तदान, देहदान व नेत्रदानात उल्लेखनीय योगदान

जगद्गुरु रामानंदाचार्य नरेंद्राचार्यजी संस्थानातर्फे रक्तदान, देहदान आणि नेत्रदान यांसारखे समाजोपयोगी उपक्रम सातत्याने राबविले जात आहेत. ‘ब्लड इन नीड’ या उपक्रमातून आतापर्यंत सुमारे ३५ हजार रुग्णांना रक्तपुरवठा करण्यात आला आहे. जानेवारी २०२६ मधील विशेष रक्तदान अभियानात १ लाख ७६ हजार २४७ रक्तपिशव्यांचे संकलन करण्यात आले. तसेच सप्टेंबर २०१६ ते मे २०२६ या कालावधीत २२१ मरणोत्तर देहदान यशस्वीरीत्या पूर्ण झाले आहेत. आता नांदेड जिल्ह्यातील देहदानाच्या कार्यानंतर नायगाव तालुक्यातील पहिले यशस्वी नेत्रदानही संस्थानाच्या पुढाकारातून पार पडल्याने अवयवदानाच्या चळवळीला नवी दिशा मिळाली असून समाजात मानवतेचा संदेश अधिक प्रभावीपणे पोहोचत आहे.

🔴मुख्य संपादक: श्री शहाजी वरखिंडे

मो. 9923072242