🛑 भ्रष्टाचाराचा स्वाद! शासकीय वसतिगृहातील निकृष्ट जेवणामुळे विद्यार्थ्यांच्या आरोग्याचा प्रश्न ऐरणीवर.

🔴 घासात भ्रष्टाचाराचा स्वाद! नायगावच्या शासकीय वसतिगृहातील विद्यार्थ्यांचा संताप.

निकृष्ट जेवण, अस्वच्छता, शुद्ध पाण्याचाही अभाव; मासवर्गीय निवासी शाळेतील कारभारावर गंभीर प्रश्नचिन्ह.

शिवगर्जना न्यूज,

नायगाव : बाळासाहेब पांडे

गरीब, होतकरू आणि मागासवर्गीय विद्यार्थ्यांच्या शिक्षणासाठी शासन कोट्यवधी रुपये खर्च करत असताना, नायगाव येथील मागासवर्गीय मुलांच्या शासकीय निवासी शाळा व वसतिगृहात विद्यार्थ्यांना निकृष्ट दर्जाचे जेवण, अस्वच्छ वातावरण आणि मूलभूत सुविधांच्या अभावाचा सामना करावा लागत असल्याचा गंभीर आरोप समोर आला आहे. इतकेच नव्हे तर, या गैरसोयींबाबत आवाज उठविणाऱ्या विद्यार्थ्यांना कारवाईची भीती दाखवून गप्प बसविले जात असल्याचा धक्कादायक दावा विद्यार्थ्यांनी केला आहे.

घरची आर्थिक परिस्थिती हलाखीची असल्याने शासनाच्या वसतिगृहावर विसंबून शिक्षण घेणाऱ्या विद्यार्थ्यांच्या ताटात पोषणमूल्ययुक्त अन्नाऐवजी निकृष्ट दर्जाचे जेवण वाढले जात असल्याची तक्रार आहे. शासनाने निश्चित केलेल्या आहार मेनूची उघडपणे पायमल्ली होत असून विद्यार्थ्यांच्या आरोग्याशी खेळ सुरू असल्याचा आरोप होत आहे.

सुमारे १०० विद्यार्थ्यांची क्षमता असलेल्या या निवासी शाळा व वसतिगृहात स्वच्छतेचा पूर्णपणे अभाव असल्याचे विद्यार्थ्यांचे म्हणणे आहे. पिण्यासाठी शुद्ध पाणी उपलब्ध नसल्याने विद्यार्थ्यांच्या आरोग्यावर गंभीर परिणाम होण्याची भीती व्यक्त होत आहे.

विद्यार्थ्यांच्या म्हणण्यानुसार, वसतिगृह प्रमुखांकडे तक्रार घेऊन गेल्यास समस्या सोडविण्याऐवजी विद्यार्थ्यांनाच धारेवर धरले जाते. “तुमच्यावर कारवाई होईल,” अशी धमकी दिली जात असल्याने अनेक विद्यार्थी भीतीपोटी तोंड उघडण्यास तयार नसल्याचे नाव न छापण्याच्या अटीवर त्यांनी सांगितले.

या सर्व प्रकारामुळे सामाजिक न्याय विभागाच्या देखरेखीखाली चालणाऱ्या वसतिगृहातील व्यवस्थापनावर प्रश्नचिन्ह निर्माण झाले असून, विद्यार्थ्यांना न्याय कधी मिळणार, असा संतप्त सवाल उपस्थित केला जात आहे.

■ वसतिगृहातील धक्कादायक वास्तव शासनाच्या मंजूर मेनू नुसार जेवण दिले जात नसल्याचा आरोप.

परिसरात स्वच्छतेचा अभाव.

पिण्यासाठी शुद्ध पाण्याची सुविधा नाही. वसतिगृहात गृहपाल व निवासी शाळेत मुख्याध्यापक वास्तव्यास नसल्याची तक्रार. शाळेचा कारभार बाह्यस्रोत सफाई कर्मचाऱ्यांकडून पाहिला जात असल्याचा आरोप.

शिक्षक नांदेडहून ये-जा करत असल्याने वेळेवर उपस्थित राहत नसल्याचा दावा. मुख्याध्यापक शेख नवाज हे नातलगामार्फत शाळेचा कारभार चालवत असल्याचा आरोप.

■ प्रशासनाने चौकशी करणार का?

विद्यार्थ्यांनी केलेले आरोप गंभीर स्वरूपाचे असून, सामाजिक न्याय विभागाने तातडीने स्वतंत्र चौकशी करून वस्तुस्थिती समोर आणावी, दोषींवर कारवाई करावी आणि विद्यार्थ्यांना दर्जेदार सुविधा उपलब्ध करून द्याव्यात, अशी मागणी पालक व नागरिकांतून होत आहे.

🔴मुख्य संपादक: श्री शहाजी वरखिंडे

मो. 9923072242