🛑 खासगी शाळेला रामराम; ‘जानवी’चा जिल्हा परिषद कन्या शाळेत प्रवेश.

🔴 खासगी शाळेला रामराम; ‘जानवी’चा जिल्हा परिषद कन्या शाळेत प्रवेश.

शिवगर्जना न्यूज,

नायगाव बाळासाहेब पांडे

नायगावात सरकारी शिक्षणावर पालकांचा वाढता विश्वास; जनसेवा फाउंडेशनकडून जिल्हा परिषद शाळांना प्राधान्य देण्याचे आवाहन.

खासगी शाळांच्या वाढत्या शुल्कवाढीला आणि पालकांवरील आर्थिक ताणाला पर्याय म्हणून नायगावात सरकारी शिक्षणावरील विश्वासाचा एक महत्त्वपूर्ण नमुना बुधवारी पाहायला मिळाला. नायगाव येथील जिल्हा परिषद प्राथमिक कन्या शाळेत विद्यार्थिनी जानवी (जिजाऊ) गजानन चव्हाण हिचा खासगी शाळेतील प्रवेश रद्द करून अधिकृतपणे जिल्हा परिषद शाळेत प्रवेश घेण्यात आला. हा प्रवेश सोहळा गटशिक्षणाधिकारी सतीश दर्शनवार यांच्या उपस्थितीत पार पडला. या निमित्ताने जनसेवा फाउंडेशनच्या वतीने पालकांना जिल्हा परिषद शाळांमध्ये आपल्या पाल्यांना प्रवेश देण्याचे आवाहन करण्यात आले.

सरकारी शाळांबाबत समाजात सकारात्मक संदेश जावा, शिक्षणाची गुणवत्ता आणि उपलब्ध सुविधा याबाबत पालकांमध्ये विश्वास निर्माण व्हावा, या उद्देशाने हा उपक्रम राबविण्यात आल्याचे यावेळी सांगण्यात आले. विशेष म्हणजे, एका पालकाने स्वतःहून खासगी शाळेतील प्रवेश रद्द करून मुलीला जिल्हा परिषद शाळेत दाखल केल्याने या घटनेची तालुक्यात चांगलीच चर्चा रंगली आहे.

यावेळी जनसेवा फाउंडेशनचे अध्यक्ष गजानन पाटील चव्हाण यांनी बोलताना सांगितले की, जिल्हा परिषद शाळांमध्ये आजही सक्षम, प्रशिक्षित व अनुभवी शिक्षक कार्यरत आहेत. शासनाच्या माध्यमातून विद्यार्थ्यांना मोफत पाठ्यपुस्तके, शैक्षणिक साहित्य, विविध शैक्षणिक योजना, सर्वसमावेशक वातावरण आणि गुणवत्तापूर्ण शिक्षण उपलब्ध करून दिले जाते. त्यामुळे पालकांनी केवळ दिखाऊपणाला भुलून खासगी शिक्षणाकडे धाव घेण्यापेक्षा सरकारी शाळांची प्रत्यक्ष गुणवत्ता तपासून निर्णय घ्यावा.

त्यांनी खासगी शाळांवर टीका करताना सांगितले की, अनेक ठिकाणी प्रवेश शुल्क, गणवेश, वह्या-पुस्तके, वार्षिक उपक्रम, वाहतूक, विविध उपक्रम शुल्क अशा नावाखाली पालकांवर वारंवार आर्थिक बोजा टाकला जातो. सर्वसामान्य कुटुंबासाठी हा वाढता खर्च परवडणारा नसतो. काही शाळांमध्ये शुल्क आकारणीतील पारदर्शक ते बाबतही पालकांमध्ये नाराजी असल्याची भावना त्यांनी व्यक्त केली. त्यामुळे शिक्षण हा व्यवसाय नव्हे, तर समाजघडणीचा पाया आहे, या भावनेतून पालकांनी शासकीय शिक्षण व्यवस्थेकडे गांभीर्याने पाहण्याची गरज असल्याचे त्यांनी स्पष्ट केले.

याच वेळी गजानन चव्हाण यांनी शासनाकडे दोन महत्त्वाच्या मागण्याही मांडल्या. जिल्हा परिषद शाळांमध्ये शिक्षण घेणाऱ्या विद्यार्थ्यांना रोजगाराच्या संधींमध्ये विशेष प्राधान्य मिळावे, तसेच विविध शासकीय योजनांमध्ये या विद्यार्थ्यांना अधिक लाभ देण्यासाठी स्वतंत्र धोरणात्मक निर्णय घ्यावा, अशी मागणी त्यांनी केली. ग्रामीण भागातील विद्यार्थ्यांना सक्षम करण्यासाठी शासनाने जिल्हा परिषद शाळांना अधिक बळ द्यावे, अशीही भूमिका त्यांनी मांडली.

या प्रवेश उपक्रमाला शिक्षण विभाग, सामाजिक क्षेत्र आणि पालकवर्गाचा उत्स्फूर्त प्रतिसाद लाभला. कार्यक्रमास गटशिक्षणाधिकारी सतीश दर्शनवार, साईनाथ कुलकर्णी, गंगासागर बिराजदार, संजय गुजलवार, सय्यद फिरदोश, सदाशिव चव्हाण, पाटील सर, संजय खेडेकर, स्वाती देशमुख, गणेश पांचाळ, वेंकट गजलवाड, मेनू शेख, विजय तमलुरे, बालाजी शिर्के, जुनेद सिद्दिकी, केराबाई चव्हाण, राजेश्वर ठिगळे, फिरदोस शेख, जावेद शेख, वसंत परतवाड, सेवक पंढरीनाथ वडपत्रे यांच्यासह विविध भागांतील पालक, शिक्षक, केंद्रप्रमुख, सामाजिक कार्यकर्ते आणि ज्येष्ठ नागरिक मोठ्या संख्येने उपस्थित होते.

या उपक्रमामुळे “सरकारी शाळा म्हणजे केवळ गरजूंकरिता नव्हे, तर गुणवत्तापूर्ण शिक्षणाचा सक्षम पर्याय” हा संदेश अधिक ठळकपणे पुढे आला आहे. जिल्हा परिषद शाळांबाबत समाजात नव्याने विश्वास निर्माण होऊन अधिकाधिक पालकांनी सरकारी शिक्षणाला प्राधान्य द्यावे, अशी अपेक्षा यावेळी व्यक्त करण्यात आली.

खासगी शिक्षणाच्या खर्चाला पर्याय म्हणून सरकारी शाळांकडे कल खासगी शाळांतील वाढते शुल्क, गणवेश व इतर खर्चामुळे पालक त्रस्त जिल्हा परिषद शाळांमध्ये मोफत पाठ्यपुस्तके, शासकीय सुविधा व प्रशिक्षित शिक्षक जानवी चव्हाणच्या प्रवेशामुळे नायगावात सरकारी शिक्षणाविषयी सकारात्मक चर्चा जनसेवा फाउंडेशनकडून पालकांना जिल्हा परिषद शाळांना प्राधान्य देण्याचे आवाहन.

शासनाकडे दोन ठोस मागण्या जिल्हा परिषद शाळांतील विद्यार्थ्यांना रोजगार संधी मध्ये विशेष प्राधान्य द्यावे विविध शासकीय योजनांमध्ये या विद्यार्थ्यांना अधिक लाभ देण्यासाठी धोरणात्मक निर्णय घ्यावा. 

🔴मुख्य संपादक: श्री शहाजी वरखिंडे

मो. 9923072242