🛑 कवी विनोद अष्टुळ यांना महाराष्ट्र रत्न पुरस्कार प्राप्त.

🔴 चतुरस्त्र कवी विनोद अष्टुळ यांना महाराष्ट्र रत्न पुरस्कार प्राप्त.

शिवगर्जना न्यूज

पूणे : प्रतिनिधी

राजर्षी शाहू महाराज यांची जयंती व दलित पॅंथर संघटनेचे अध्यक्ष बापूसाहेब भोसले यांच्या वाढदिवसानिमित्त युवा महाराष्ट्र फाउंडेशन संस्था आणि आंतरराष्ट्रीय मानवाधिकार राजदूत संघटना यांच्यातर्फे पत्रकार भवन पुणे येथे राज्यस्तरीय महाराष्ट्र रत्न पुरस्कार २०२६, पत्रकार सन्मान सोहळा व पुरस्कार वितरण सोहळा आयोजित करण्यात आला होता. विचार पिठावर ह.भ.प.चेतनानंद महाराज पुणेकर, दलित पॅंथरचे अध्यक्ष बापूसाहेब भोसले, संस्थेचे संस्थापक अध्यक्ष डॉ.अविनाश संकुडे, चित्रपट महामंडळाचे सल्लागार ॲड.मंदार जोशी, पत्रकार संघाचे उपाध्यक्ष जाधव साहेब, एम.आय.टीचे डायरेक्टर थोरवेसाहेब असे इतर मान्यवर उपस्थित होते.

विनोद अष्टुळ यांनी मराठी भाषा संवर्धनासाठी गेल्या चौदा वर्षात सातत्याने दोनशे सव्वीस साहित्य सम्राट पुणे संस्थेच्या मार्फत मासिक कवी संमेलन, कवींचे वाढदिवस, वारीतील संमेलन, साहित्यिक श्रावण सहल, शब्दकोड दिवाळी, काव्यचित्र प्रदर्शन, आकाशवाणी सादरीकरण, मोफत ग्रंथपेढी, संयुक्त कवीसंमेलने, बहुभाषिक कवीसंमेलने, साहित्य सन्मान पुरस्कार असे नाविन्यपूर्ण उपक्रम उद्याने, मंदिरे, ग्रंथालये, दवाखाना, सुवर्णपेढी, अनाथ आश्रम, लहान मोठे सभागृहे, स्मशानभूमीत सुद्धा घेतले जात असून शाळा, कॉलेज आणि विविध उत्सवांसाठी शब्द बोले काळजाला हा विशेष उपक्रम राबविण्यात येतो. अष्टुळ यांनी सर्वांसाठी खुले आणि विनामूल्य असे व्यासपीठ निर्माण केले आहे. त्यामुळे अनेक नामवंत कवी लेखक आणि साहित्यिक निर्माण झाले आहेत. अष्टुळ हे सहकार, कामगार, आध्यात्मिक, कला आणि साहित्यिक अशा विविध क्षेत्रांमध्ये सातत्याने प्रामाणिकपणे विविध पदांवर कार्य करत आहेत. यामुळेच त्यांना आजवर अण्णाभाऊ साठे, छत्रपती संभाजी महाराज, अटल बिहारी वाजपेयी, कुसुमाग्रज, आद्यकवी कालिदास, कवी संजीव, महाराष्ट्र भूषण, मोहम्मद रफी, टॉप टेन कवी, चतुरस्त्र कवी आणि मनपा पुणे गुणवंत गौरव असे अनेक पुरस्कार प्राप्त झालेले आहेत. यांच्या कार्याचा आढावा घेऊन युवा महाराष्ट्र प्रतिष्ठान संस्थेने चतुरस्त्र कवी विनोद अष्टुळ यांना मान्यवरांच्या हस्ते महाराष्ट्र रत्न पुरस्कार २०२६ प्रदान केला आहे.

ह.भ.प.चेतनानंद महाराज पुणेकर यांनी आपल्या अमृतवाणीतून विविध क्षेत्रातील पुरस्कार्थींना माणूस, समाज आणि राष्ट्र जोडण्याचे काम करण्यासाठी सत्यातील ईश्वराची ओळख करून दिली. सर्व महामानव हे मानवतावादासाठीच झिजले असून त्यांच्या कार्याचा माणुसकी हा समान धागा आहे. त्यांना वेगळे न करता सर्वांनी त्यांचे कार्य आत्मसात करून प्रत्येकाने पुढील कार्य आनंदाने करावे. अशाप्रकारे महाराजांनी सर्वांना प्रबोधनात्मक शुभेच्छा दिल्या.

यावेळी सिने नाट्य अभिनेते प्रशांत बोगम, श्रीकृष्ण भिंगारे, गायक प्रशांत राठोड, गायिका श्रुतीका क्षीरसागर, विजय रणदिवे यांनी विशेष कौतुक केले. कार्यक्रमाचे सूत्र संचालन गणेश मोढवे तर आभार बापूसाहेब भोसले यांनी व्यक्त केले.

🔴मुख्य संपादक: श्री शहाजी वरखिंडे

मो. 9923072242