🛑 जागतिक संगीत दिनानिमित्त विविध क्षेत्रातील साधकांचा गौरव.

38

By Shahaji Warkhinde

June 22, 2026

🔴 जागतिक संगीत दिनानिमित्त सुरांच्या साजात रंगली ‘संगीत संध्या’; संगीत, योग व शैक्षणिक क्षेत्रातील साधकांचा गौरव.

शिवगर्जना न्यूज,

नायगाव : प्रतिनिधी

जागतिक संगीत दिनाचे औचित्य साधत नायगाव शहरातील सकल संगीत साधकांच्या वतीने रविवारी (२१ जून) रात्री आयोजित करण्यात आलेली ‘संगीत संध्या’ ही मैफल सुरेल वातावरणात आणि उत्साहात पार पडली. भारतीय शास्त्रीय गायन, अभंगवाणी आणि संगीताच्या आराधनेचा सुंदर मिलाफ अनुभवण्यासाठी संगीतप्रेमींनी मोठी गर्दी केली.

“संगीत हीच साधना… संगीत हीच आराधना…!” या संकल्पनेतून आयोजित करण्यात आलेल्या या मैफिलीत शहरातील विविध संगीत साधकांनी आपल्या गायनकलेने रसिकांची मने जिंकली. भारतीय शास्त्रीय संगीताची समृद्ध परंपरा आणि अभंगवाणीच्या माध्यमातून सांस्कृतिक व अध्यात्मिक वारसा जपण्याचा संदेश या कार्यक्रमातून देण्यात आला.

लक्ष्मी वेंकटेश नगर येथील श्री. शंकरराव बिरादार यांच्या निवासस्थानी रात्री ९ ते ११ या वेळेत झालेल्या या कार्यक्रमास संगीतप्रेमी व रसिक नागरिकांनी मोठ्या संख्येने उपस्थित राहून सुरेल मैफिलीचा मनमुराद आनंद लुटला.

या कार्यक्रमात ज्येष्ठ पत्रकार बाळासाहेब पांडे यांच्या अध्यक्षतेखाली जागतिक संगीत दिन, आंतरराष्ट्रीय योग दिन आणि ‘बाप दिन’ निमित्त विविध क्षेत्रातील उल्लेखनीय योगदान देणाऱ्या साधकांचा सत्कार करण्यात आला.

संगीत क्षेत्रातील योगदानाबद्दल शंकर बिरादार, योग क्षेत्रातील कार्याबद्दल योगगुरू वसंत माने, तर सीईटी परीक्षेत ९९.९९ टक्के गुण मिळवून जिल्ह्यात प्रथम आलेल्या कु. अनुष्का अतुल कवटीकवार हिचा विशेष सत्कार करण्यात आला. तसेच आदर्श पालक म्हणून प्रसिद्ध सराफा व्यापारी अतुल कवटीकवार यांचाही गौरव करण्यात आला.

अध्यक्षीय समारोपात बाळासाहेब पांडे यांनी संगीत, योग आणि शिक्षण ही समाजाला दिशा देणारी त्रिसूत्री असल्याचे सांगत अशा उपक्रमांचे सातत्याने आयोजन व्हावे, असे मत व्यक्त केले. कार्यक्रमाचे सूत्रसंचालन विश्वेश्वर जोशी यांनी केले, तर मनोज आरगुलवार यांनी आभार मानले.

यावेळी नामदेव पांचाळ, पत्रकार बालाजी नागठाणे, सचिन कवटीकवार, मारोती कतुरवार, बालाजी चौधरी, लक्ष्मण बुद्धलवाड गागलेगावकर, विजय द्रोणाचार्य, शंकर वडजे, सौ. बिरादार ताई, माधव भेदे आदींसह अनेक संगीत साधक व रसिक उपस्थित होते.

🔴मुख्य संपादक: श्री शहाजी वरखिंडे

मो. 9923072242

Previous article

🛑 प्रत्येक वेदना सहन करत “बाप” फक्त आपल्या मुलांसाठी जगत असतो.

Next article

🛑 वीजेचा तडाखा; कडब्याची गंजी जळून खाक.

Shahaji Warkhinde

ताज्या बातम्या

ताज्या बातम्या