🛑 “संगीत महर्षी पं. बाबुराव उप्पलवार यांचा सहस्त्र चंद्रदर्शन सोहळा देगलूर मध्ये जल्लोषात”

🛑 “संगीत महर्षी पं. बाबुराव उप्पलवार यांचा सहस्त्र चंद्रदर्शन सोहळा देगलूर मध्ये जल्लोषात”

शिवर्जना न्यूज, 

देगलूर प्रतिनिधी :

नांदेड जिल्ह्यातील वैभव आणि संगीत क्षेत्रातील महामेरू म्हणून ओळखले जाणारे गुरुवर्य पंडित बाबुराव उप्पलवार यांचा सहस्त्र चंद्रदर्शन सोहळा देगलूर येथे मोठ्या उत्साहात आणि भक्तिमय वातावरणात संपन्न झाला. बंडयाप्पा मठ संस्थान, गांधी चौक येथे १८ एप्रिल रोजी पार पडलेल्या या सोहळ्याला शिष्यवर्ग, मान्यवर व संगीत प्रेमींची मोठी उपस्थिती लाभली.

देगलूर परिसरासह नांदेड जिल्ह्यातील असंख्य विद्यार्थ्यांना निशुल्क संगीत शिक्षण देत त्यांच्या आयुष्याला दिशा देणाऱ्या पं. उप्पलवार यांच्या कार्याचा गौरव करण्यासाठी हा सोहळा आयोजित करण्यात आला होता. संगीताच्या माध्यमातून अनेकांचे जीवन घडवणाऱ्या या महान व्यक्तिमत्त्वाचा सन्मान करताना परिसर भावूक झाला.

सोहळ्याच्या प्रारंभी पं. उप्पलवार यांच्या आगमनावेळी टाळ-मृदंगाच्या गजरात आणि फुलांच्या वर्षावात त्यांचे भव्य स्वागत करण्यात आले. कार्यक्रमाच्या अध्यक्षस्थानी ह.भ.प. सद्गुरु चंद्रशेखर महाराज देगलूरकर होते. प्रमुख पाहुणे म्हणून १०८ सोमलिंग शिवाचार्य महास्वामी महाराज बिचकुंदेकर, शाहीर रमेश गिरी, शाहीर दिगु तुमवाड, पत्रकार गोविंद मुंडकर आदी मान्यवर उपस्थित होते.

यावेळी पं. उप्पलवार यांच्या शिष्यांनी आपल्या भावना व्यक्त करत, “गुरूंनी केवळ संगीतच नाही तर माणुसकीचेही धडे दिले,” अशी कृतज्ञता व्यक्त केली. शाहीर दिगु तुमवाड यांनी त्यांच्या खडतर जीवनप्रवासाचे वर्णन करत गुरूंनी दिलेल्या सहकार्याची आठवण करून दिली. पत्रकार गोविंद मुंडकर यांनी अशा प्रकारचे सोहळे समाजात क्वचितच पाहायला मिळतात, असे सांगत गुरूंच्या कार्याची उंची अधोरेखित केली.

या सोहळ्यासाठी शिष्यवर्गाने अथक परिश्रम घेत कार्यक्रम अविस्मरणीय केला. कार्यक्रमाचे प्रास्ताविक डॉ. जगदीश देशमुख यांनी केले. सूत्रसंचालन बालाजी सुगावकर यांनी तर आभार प्रदर्शन गंगाधर बिल्लाळीकर यांनी मानले.

🔴मुख्य संपादक: श्री शहाजी वरखिंडे मो. 9923072242