🛑 पोलीस अधिक्षक यांच्या पथकाने अवैधरित्या वाहतूक करणारा वाळुचा हायवा पकडला

🔴 पोलीस अधिक्षक यांच्या पथकाने अवैधरित्या वाहतूक करणारा वाळुचा हायवा पकडला. 

शिवगर्जना न्यूज, 

कुंडलवाडी (सिध्दार्थ कांबळे) 

कुंडलवाडी पोलीस ठाण्याच्या अंतर्गत असलेल्या मौजे हुनगुंदा, नागणी येथील मांजरा नदी पात्रातून अवैद्य रित्या वाळूची वाहतूक करणाऱ्या हायवावर पोलीस अधिक्षक अबिनाश कुमार यांच्या पथकाने दिनांक ११ मार्च रोजी संत कबीर विद्यालय पिंपळगाव (कुं.) येथे पकडून मोठी कारवाई केल्यामुळे स्थानिक महसूल प्रशासनाच्या पथकाचे पितळ उघड झाले आहे. या कारवाईत १८ लाख २५ हजाराचा मुद्दे माल जप्त करून दोन आरोपीवर गुन्हा दाखल करून त्यांना ताब्यात घेण्यात आले आहे.

तेलगंणा राज्याच्या सीमेवर असलेल्या कुंडलवाडी पोलीस ठाण्याच्या अंतर्गत असलेले मौजे हुनगुंदा व नागणी येथील मांजरा नदी पात्र हे लाल वाळूचे कोठार समजले जाते, या लाल वाळूला राज्यासह तेलंगाणा व कर्नाटक राज्यात मोठी मागणी असल्यामुळे या नदी पात्रातून आजतागायत दररोज मध्यरात्री किमान ४० हायवा व अनेक ट्रॅक्टरच्या माध्यमातून सर्रास पणे रेती माफिया रेतीची अवैद्य वाहतूक करून महसूल प्रशासनाचे महसूल बुडवत आहेत अशा गंभीर बाबीकडे स्थानिक महसूल प्रशासनाचे मात्र जाणीव पूर्वक दुर्लक्ष होत असल्याचे पहावयास मिळत आहे.

असे असले तरी, जिल्ह्यात पोलीस अधिक्षक अबिनाश कुमार यांनी ऑपरेशन फ्लॅश आउट अंतर्गत नांदेड जिल्ह्या मध्ये वाळू माफियांकडून अवैद्य मार्गाने वाळू उपसा व वाहतूक संदर्भाने कठोर कारवाई करण्याचे आदेश दिले होते, त्या अनुषंगाने दिनांक ११ मार्च रोजी रात्री ०२:३० वाजताच्या दरम्यान पोलीस स्टेशन कुंडलवाडी हद्दीत विशेष पथकातील पोलीस अधिकारी व अंमलदार हे पेट्रोलिंग करीत असताना त्यांना मौजे पिंपळगाव (कुं.) ता.बिलोली या भागात अवैद्य वाळू वाहतूक होत असल्याची गुप्त माहिती मिळाल्यावर तात्काळ पिंपळगाव (कुं.) येथे जाऊन येथील संत कबीर विद्यालया समोर हायवा क्रमांक GJ 36 T 5211 या वाहनाला पकडून हायवा किंमत १८ लाख पाच ब्रास रेती किंमत २५ हजार एकूण १८ लाख २५ हजाराचा मुद्देमाल जप्त करून फिर्यादी पोलीस कॉन्स्टेबल रवींद्र सुधाकरराव देशमुख यांच्या फिर्यादी वरून आरोपी चालक धम्मानंद शंकर सोनकांबळे वय ३९ वर्षे राहणार अर्जापूर, दत्ता पाटील शिंदे राहणार नागणी यांच्या विरुद्ध गुन्हा रजिस्टर नंबर ४७/२०२५ कलम ३०३ (२)३ (५) भारतीय न्याय संहितेनुसार गुन्हा दाखल करण्यात आला आहे.

सदरील कार्यवाही पोलीस अधीक्षक अविनाश कुमार, अप्पर पोलीस अधीक्षक खंडेराव धरणे, अप्पर पोलीस अधीक्षक सुरज गुरव, पोलीस निरीक्षक स्थानिक गुन्हा शाखा उदय खंडेराय यांच्या मार्गदर्शनाखाली सहाय्यक पोलीस निरीक्षक विशेष पथक व्ही.एस. आरसेवार, पोलीस कॉन्स्टेबल रणजीत मुदीराज, बद्रीनाथ इंदेपवाड, मारोती सोनटक्के, आदींनी केली आहे. या कार्यवाहीमुळे अवैद्य वाळू माफीयांचे धाबे दणाणले आहेत.

शिवगर्जना न्यूज संपादक : श्री शहाजी वरखिंडे

बातम्या व जाहिरातीसाठी संपर्क 🗣📲📞

(9923072242)