🔴 सोयाबीन खरेदीतील ‘कट्टी’ला चाप! जिल्हा उपनिबंधकांचे बाजार समित्यांना कडक निर्देश

🔴 सोयाबीन खरेदीतील ‘कट्टी’ला चाप! जिल्हा उपनिबंधकांचे बाजार समित्यांना कडक निर्देश

५० किलोच्या भरतीतून दोन किलो कपातीच्या तक्रारींची दखल; नियमबाह्य कट्टी करणाऱ्या व्यापाऱ्यांवर कारवाईचे संकेत

शिवगर्जना न्यूज,

नायगाव : बाळासाहेब पांडे

नांदेड जिल्ह्यात सोयाबीन खरेदीदरम्यान शेतकऱ्यांकडून अवाजवी कट्टी (कडता-कसर) आकारली जात असल्याच्या तक्रारींची जिल्हा उपनिबंधकांनी गंभीर दखल घेतली आहे. नियमबाह्य कपात करणाऱ्या व्यापारी व आडतदारांवर कायद्यानुसार कारवाई करण्याचे निर्देश जिल्ह्यातील सर्व कृषी उत्पन्न बाजार समित्यांना देण्यात आले आहेत.

प्रत्येक पोत्यामागे दोन किलोचे नुकसान?

नियमानुसार बारदान्यासह ५० किलो २०० ग्रॅम वजन अपेक्षित असताना, काही ठिकाणी ५२ किलो सोयाबीनच्या भरतीतून दोन किलो कट्टी लावली जात असल्याची तक्रार करण्यात आली आहे. त्यामुळे सोयाबीन उत्पादक शेतकऱ्यांचे आर्थिक नुकसान होत असल्याचे तक्रारीत नमूद आहे.

बाजार समित्यांची जबाबदारी वाढली

महाराष्ट्र कृषी उत्पन्न खरेदी-विक्री (विकास व विनियमन) अधिनियम, १९६३ मधील तरतुदींनुसार नियमबाह्य कट्टी आढळल्यास संबंधित व्यापाऱ्यांवर वैधानिक कारवाई करण्याचे निर्देश देण्यात आले आहेत. शेतमालाच्या वजनावर देखरेख ठेवणे, खरेदी केंद्रांची तपासणी करणे आणि तक्रारींवर तातडीने कार्यवाही करणे, ही जबाबदारी बाजार समित्यांवर निश्चित करण्यात आली आहे.

शेतकऱ्यांना दिलासा मिळण्याची अपेक्षा

पावसाच्या अनियमिततेमुळे आणि उत्पादनातील घटीमुळे अडचणीत असलेल्या शेतकऱ्यांना सोयाबीन विक्रीत नियमबाह्य कपातीचा फटका बसू नये, यासाठी या निर्देशांची काटेकोर अंमलबजावणी होणे आवश्यक आहे. आता बाजार समित्या किती तत्परतेने कारवाई करतात, याकडे जिल्ह्यातील सोयाबीन उत्पादक शेतकऱ्यांचे लक्ष लागले आहे.

🔴मुख्य संपादक: श्री शहाजी वरखिंडे                  मो. 9923072242