🛑 जिल्हाधिकारी राहुल कर्डिले आक्रमक, नेरळीतील एसबीआयला अचानक भेट देत बँक अधिकाऱ्यांना निर्देश.

🔴 पात्र शेतकऱ्यांना विनाविलंब पीक कर्ज द्या!

जिल्हाधिकारी राहुल कर्डिले यांचे बँक अधिकाऱ्यांना निर्देश; नेरळीतील एसबीआयला अचानक भेट

अनावश्यक कागदपत्रांची मागणी टाळा; प्रलंबित कर्ज प्रकरणे तातडीने निकाली काढण्याच्या सूचना. 

शिवगर्जना न्यूज : नांदेड प्रतिनिधी

नांदेड : पात्र शेतकऱ्यांना पीक कर्ज मिळविताना कोणत्याही अडचणींचा सामना करावा लागू नये, तसेच त्यांना विनाविलंब कर्ज उपलब्ध करून द्यावे, असे स्पष्ट निर्देश जिल्हाधिकारी राहुल कर्डिले यांनी बँक अधिकाऱ्यांना दिले. नेरळी येथील भारतीय स्टेट बँकेला अचानक भेट देऊन त्यांनी पीक कर्ज वितरणासह विविध कर्ज प्रकरणांचा आढावा घेतला. यावेळी बँकेत आलेल्या शेतकऱ्यांशी संवाद साधत त्यांच्या अडचणीही जाणून घेतल्या.

अनावश्यक कागदपत्रांचा आग्रह नको

पीक कर्जासाठी शेतकऱ्यांकडून अनावश्यक कागदपत्रांची मागणी करून त्यांना त्रास देऊ नये. उपलब्ध ऑनलाइन सुविधांचा वापर करून सातबारा उतारा प्राप्त करावा आणि पात्र शेतकऱ्यांच्या कर्ज अर्जांवर तातडीने कार्यवाही करावी, अशा सूचना जिल्हाधिकारी राहुल कर्डिले यांनी बँक अधिकाऱ्यांना दिल्या. कर्ज मंजुरीची प्रक्रिया सुलभ करून शेतकऱ्यांना वेळेत कर्ज मिळेल, यासाठी आवश्यक दक्षता घेण्याचेही त्यांनी बजावले.

प्रलंबित कर्ज प्रकरणांचा घेतला आढावा

बँकेतील प्रलंबित कर्ज प्रकरणे, शेतकऱ्यांकडून प्राप्त झालेले अर्ज, आवश्यक कागदपत्रांबाबत निर्माण होणाऱ्या अडचणी आणि त्यावरील उपाययोजनांची जिल्हाधिकाऱ्यांनी माहिती घेतली. सामाईक क्षेत्रातील शेतकऱ्यांना पीक कर्ज उपलब्ध करून देताना येणाऱ्या अडचणींबाबतही त्यांनी बँक अधिकाऱ्यांशी चर्चा केली. अशा प्रकरणांमध्ये नियमानुसार योग्य पर्याय शोधून कर्ज वितरणाची प्रक्रिया सुलभ करण्याचे निर्देश त्यांनी दिले.

शेतकऱ्यांना वेळेत कर्ज उपलब्ध करून द्या

पीक कर्ज हे शेतकऱ्यांच्या शेतीविषयक गरजा पूर्ण करण्यासाठी महत्त्वाचे असून, कर्ज वितरणात अनावश्यक विलंब होता कामा नये. शेतकऱ्यांच्या अर्जांवर वेळेत निर्णय घेऊन पात्र लाभार्थ्यांना कर्ज उपलब्ध करून देण्याची जबाबदारी बँकांनी गांभीर्याने पार पाडावी, असे जिल्हाधिकारी राहुल कर्डिले यांनी स्पष्ट केले.

🔴मुख्य संपादक: श्री शहाजी वरखिंडे                  मो. 9923072242