🔴 मांजरमकर यांना ‘शिवरत्न जिवाजी महाले शौर्य पुरस्कार–२०२६’ प्रदान.

🔴 उत्तम गोरडवार (मांजरमकर) यांना ‘शिवरत्न जिवाजी महाले शौर्य पुरस्कार–२०२६’ प्रदान.

शिक्षण, समाजसेवा आणि पत्रकारितेतील उल्लेखनीय योगदानाचा मान्यवरांच्या उपस्थितीत गौरव.

शिवगर्जना न्यूज,

नायगाव : बाळासाहेब पांडे

नायगाव : सामाजिक कार्य आणि पत्रकारितेच्या माध्यमातून समाजहितासाठी उल्लेखनीय योगदान देणारे सेवानिवृत्त माध्यमिक शिक्षक तथा ज्येष्ठ पत्रकार उत्तम गंगाधरराव गोरडवार (मांजरमकर) सर यांना प्रतिष्ठेचा ‘शिवरत्न जिवाजी महाले शौर्य पुरस्कार–२०२६’ प्रदान करून सन्मानित करण्यात आले. शिवरत्न जिवाजी महाले यांच्या जयंतीनिमित्त जयंती महोत्सव समितीच्या वतीने आयोजित सोहळ्यात त्यांच्या कार्याचा गौरव करण्यात आला.

या पुरस्कार वितरण सोहळ्यास राज्याचे माजी मुख्यमंत्री तथा खासदार अशोकरावजी चव्हाण, खासदार वडकुते साहेब, आमदार बालाजीराव कल्याणकर, आमदार आनंदरावजी बोंढारकर, आमदार अमरभाऊ राजूरकर, माजी मंत्री डी. पी. सावंत यांच्यासह विविध क्षेत्रांतील मान्यवर उपस्थित होते.

शिक्षणातून विद्यार्थ्यांना दिशा, समाजसेवेतून जनहिताचा ध्यास. 

उत्तम गोरडवार सर यांनी शिक्षक म्हणून प्रदीर्घ काळ सेवा बजावत असताना अनेक विद्यार्थ्यांच्या आयुष्याला योग्य दिशा देण्याचे मोलाचे कार्य केले. अध्यापनाच्या माध्यमातून भावी पिढी घडविण्यासोबतच त्यांनी सामाजिक बांधिलकी जपत समाजहिताच्या विविध उपक्रमांत सक्रिय सहभाग नोंदविला. सेवानिवृत्तीनंतरही त्यांचे समाजसेवेचे कार्य अखंडपणे सुरू आहे.

पत्रकारितेतून जनसामान्यांच्या प्रश्नांना वाचा

पत्रकारितेच्या क्षेत्रातही उत्तम गोरडवार सर यांनी स्वतःची वेगळी ओळख निर्माण केली आहे. ‘सा. महाराष्ट्र संचार’चे कार्यकारी संपादक तसेच ‘लोकोन्नती’ साप्ताहिकाचे मुख्य संपादक म्हणून ते जबाबदारी सांभाळत आहेत. सामाजिक प्रश्नांना वाचा फोडणे, सर्वसामान्य नागरिकांच्या समस्या प्रभावीपणे मांडणे आणि समाजात सकारात्मक परिवर्तन घडविण्यासाठी पत्रकारितेच्या माध्यमातून प्रयत्न करणे, हे त्यांच्या कार्याचे वैशिष्ट्य राहिले आहे.

मांजरमकर परिसरातून अभिनंदनाचा वर्षाव!

शिक्षण, समाजसेवा आणि पत्रकारिता या तिन्ही क्षेत्रांत त्यांनी दिलेल्या योगदानाची दखल घेऊन हा पुरस्कार प्रदान करण्यात आला. या सन्मानामुळे त्यांच्या प्रदीर्घ कार्याचा गौरव झाला असून मांजरमकर परिसरासह मित्रपरिवार, सहकारी आणि विविध क्षेत्रांतील मान्यवरांकडून त्यांच्यावर अभिनंदनाचा वर्षाव होत आहे.

समाजाप्रती असलेली बांधिलकी जपत शिक्षण, समाजप्रबोधन आणि पत्रकारितेच्या माध्यमातून समाजहितासाठी कार्य करणाऱ्या उत्तम गोरडवार सर यांच्या शिरपेचात या पुरस्काराच्या रूपाने आणखी एक मानाचा तुरा खोवला गेला आहे. त्यांच्या या उल्लेखनीय यशाबद्दल सर्व स्तरांतून त्यांचे अभिनंदन करण्यात येत असून पुढील वाटचालीसाठी शुभेच्छा दिल्या जात आहेत.

🔴मुख्य संपादक: श्री शहाजी वरखिंडे                  मो. 9923072242