🛑 एस.टी. प्रवाशांची जहीराबादच्या श्री साई परिवार ढाब्यावर लूट? ₹४०च्या नाश्त्याचे ₹७०

🔴 एसटी प्रवाशांची जहीराबादच्या श्री साई परिवार ढाब्यावर लूट? ₹४०च्या नाश्त्याचे ₹७०; चालक-वाहकांच्या भूमिकेवर ही प्रश्न. 

शिवगर्जना न्यूज,

जहीराबाद :

महाराष्ट्रातून हैदराबादकडे जहीराबादमार्गे धावणाऱ्या लांब पल्ल्याच्या एसटी बसमधील प्रवाशांसाठी अधिकृत हॉटेल थांब्यांवर चहा-नाश्त्याचे दर निश्चित करण्यात आलेले असताना, जहीराबाद येथील श्री साई परिवार ढाब्यावर प्रवाशांकडून मनमानी दर आकारले जात असल्याचा गंभीर आरोप समोर आला आहे.

एसटीच्या अधिकृत व्यवस्थेनुसार १ जून २०२६ पासून चहा-नाश्त्यासाठी ₹४०चा निश्चित दर लागू करण्यात आल्याची माहिती आहे. अशा परिस्थितीत दोन इडली आणि एक वडा यासाठी ₹७० आकारले जात असल्याची प्रवाशांची तक्रार आहे. विशेष म्हणजे तेलंगणातील अनेक ठिकाणी याच प्रकारच्या नाश्त्याचे दर ३० ते ४० रुपयांच्या आसपास असल्याचे प्रवाशांचे म्हणणे आहे.

मग ₹४०च्या निश्चित दराऐवजी ₹७० का? महागाई वाढल्याचे कारण ढाबा व्यवस्थापनाकडून सांगितले जात असल्याचे प्रवाशांनी सांगितले. मात्र अधिकृत एसटी थांबा असल्यास करारातील दर व नियमांचे पालन करणे अपेक्षित नाही का, असा सवाल प्रवाशांकडून उपस्थित केला जात आहे.

चालक-वाहकांच्या भूमिकेवरही प्रश्नचिन्ह

प्रवाशांच्या आरोपानुसार, चालक-वाहकांना ढाब्यावर मोफत चहा-नाश्ता दिला जात असल्याने प्रवाशांकडून कितीही पैसे आकारले गेले तरी त्याकडे दुर्लक्ष केले जाते. एका एसटी बसच्या थांब्यासाठी ढाबा चालकांकडून आर्थिक देवाणघेवाण होते का? याचीही एसटी प्रशासनाने चौकशी करावी, अशी मागणी प्रवाशांकडून होत आहे.

२०२६ मध्ये एसटी प्रशासनाने अधिकृत हॉटेल थांब्यां बाबत नियम अधिक कडक केले असून, प्रवाशांकडून होणाऱ्या तक्रारींच्या पार्श्वभूमीवर संबंधित हॉटेलची तपासणी आणि अधिकाऱ्यांची जबाबदारी निश्चित करण्याचे निर्देश देण्यात आले आहेत.

दरपत्रक कुठे? तक्रार पुस्तक कुठे?

श्री साई परिवार ढाब्यावर खाद्यपदार्थांचे दरपत्रक ठळकपणे लावलेले नसल्याचा प्रवाशांचा आरोप आहे. त्याहून गंभीर बाब म्हणजे तक्रार पुस्तक मागितले असता ते उपलब्ध नसल्याचे सांगण्यात आल्याची तक्रार आहे. तसेच महिला प्रवाशांकडून स्वच्छतागृह वापरण्यासाठी पैसे घेतले जात असल्याचेही प्रवाशांनी सांगितले.

अधिकृत एसटी हॉटेल थांब्यावर प्रवाशांना योग्य दरात खाद्य पदर्थ, स्वच्छता आणि मूलभूत सुविधा मिळणे अपेक्षित आहे. त्यामुळे या संपूर्ण प्रकरणाची एसटीच्या वरिष्ठ अधिकाऱ्यांनी प्रत्यक्ष चौकशी करून संबंधित हॉटेलचा करार, दरपत्रक, बस थांब्याची नोंद आणि चालक-वाहकांशी संबंधित व्यवहार तपासावेत, अशी मागणी होत आहे.

असे प्रकार प्रवाशासोबत घडल्यास प्रवाशांनी तक्रार कुठे करावी?

अशा प्रकारचा अनुभव आल्यास प्रवाशांनी तक्रारीसाठी एसटी महामंडळाच्या २४ तास टोल-फ्री हेल्पलाइन क्रमांक 1800-22-1250 वर संपर्क साधावा. एसटीच्या अधिकृत माहितीनुसार हा क्रमांक प्रवाशांच्या तक्रारी व सूचनांसाठी उपलब्ध आहे.

तक्रार करताना बस क्रमांक/मार्ग, तारीख-वेळ, हॉटेलचे नाव, आकारलेली रक्कम, तिकीट किंवा बिल आणि शक्य असल्यास फोटो-व्हिडिओ जतन करणे उपयुक्त ठरेल.

एस.टी. प्रशासनाने या तक्रारीची केवळ कागदोपत्री चौकशी न करता प्रत्यक्ष तपासणी करावी आणि प्रवाशांची कथित लूट थांबवावी, अशी मागणी आता जोर धरत आहे.

🔴मुख्य संपादक: श्री शहाजी वरखिंडे                   मो. 9923072242