🛑 दुष्काळाच्या झळा पाहण्यासाठी पालकमंत्री शेतात

🛑 दुष्काळाच्या झळा पाहण्यासाठी पालकमंत्री शेतात; सोयाबीनची पाहणी

शेतकऱ्यांच्या व्यथा ऐकून पालकमंत्री अतुल सावे यांनी दिला धीर; पंचनामे करून वस्तुनिष्ठ अहवाल सादर करण्याचे निर्देश

शिवगर्जना न्यूज

नायगाव : बाळासाहेब पांडे

नायगाव तालुक्यात पावसाच्या प्रदीर्घ खंडामुळे खरीप पिकांचे मोठे नुकसान झाले असून, या दुष्काळी परिस्थितीची प्रत्यक्ष पाहणी करण्यासाठी पालकमंत्री अतुल सावे यांनी रविवारी (दि. २७) पळसगाव फाटा येथे शेतात जाऊन सोयाबीन पिकाची पाहणी केली.

यावेळी शेतकऱ्यांनी हातातील सोयाबीनच्या शेंगा दाखवत पिकांची दयनीय अवस्था पालकमंत्र्यांच्या निदर्शनास आणून दिली. वरून शेंगा दिसत असल्या तरी त्यामध्ये दाणे भरलेले नसल्याने उत्पादनात मोठी घट होणार असल्याचे शेतकऱ्यांनी सांगितले. वाढता उत्पादन खर्च आणि अत्यल्प उत्पन्नामुळे शेतकरी आर्थिक अडचणीत सापडल्याची व्यथा त्यांनी मांडली.

यावेळी एका शेतकरी पुत्राने शेतीसाठी आतापर्यंत झालेला खर्च, काढणीचा वाढता खर्च तसेच एमबीएच्या शिक्षणाची फी कशी भरायची, अशी भावनिक व्यथा पालकमंत्र्यांसमोर मांडली. त्याची व्यथा ऐकून पालकमंत्री अतुल सावे यांनी त्याच्या पाठीवर हात ठेवत धीर दिला.

“शेतकरी बांधव आणि शेतकरी पुत्रांनी घाबरून जाऊ नये. शासन आपल्या पाठीशी आहे,” असा विश्वास पालकमंत्री सावे यांनी व्यक्त केला.

पंचनामे करून वस्तुनिष्ठ अहवाल सादर करा

दुष्काळी परिस्थितीच्या पार्श्वभूमीवर सर्व पिकांचे पंचनामे करून नुकसानीचे वस्तुनिष्ठ अहवाल सादर करण्याचे निर्देश प्रशासनाला देण्यात आले आहेत. शेतकऱ्यांच्या अडचणींची गांभीर्याने दखल घेऊन आवश्यक उपाययोजना करण्याच्या सूचना पालकमंत्र्यांनी दिल्या.

यावेळी आमदार राजेश पवार, भाजप जिल्हाध्यक्ष संतुकराव हंबर्डे, जिल्हाधिकारी राहुल कर्डिले, मुख्य कार्यकारी अधिकारी महेश पाटील यांच्यासह विविध अधिकारी, पदाधिकारी व शेतकरी उपस्थित होते.

अधिकाऱ्यांची आमदार राजेश पवार यांनी घेतली बैठक

पालकमंत्र्यांच्या पीक पाहणीनंतर आमदार राजेश पवार यांनी तहसीलदार, गटविकास अधिकारी, कृषी अधिकारी व संबंधित अधिकाऱ्यांची बैठक घेतली. दुष्काळी परिस्थितीत पिण्याचे पाणी, जनावरांसाठी पाणी, चारा तसेच इतर आवश्यक उपाययोजनांचे नियोजन करण्याचे निर्देश त्यांनी दिले.

पीक पाहणी, सर्वेक्षण आणि पंचनाम्याच्या कामात कोणत्याही प्रकारची दिरंगाई किंवा हलगर्जीपणा होऊ नये. गावनिहाय परिस्थितीचा अचूक आढावा घेऊन शासनाला वस्तुस्थितीवर आधारित अहवाल सादर करावा, अशा सूचना आमदार पवार यांनी अधिकाऱ्यांना दिल्या.

“सर्वेक्षणाच्या कामात कोणतीही मागणी किंवा गैरप्रकार निदर्शनास आल्यास त्याची गय केली जाणार नाही,” असा स्पष्ट इशाराही त्यांनी दिला.

दरम्यान, दुष्काळी उपाययोजनांमध्ये जमीन महसुलात सूट, पीक कर्जाचे पुनर्गठन, कर्जवसुलीस स्थगिती, कृषीपंपांच्या वीजबिलासंबंधी सवलती, विद्यार्थ्यांच्या परीक्षा शुल्कात माफी तसेच पाणीपुरवठा व पशुधनासाठी आवश्यक उपाययोजनांचा समावेश आहे.

 शेतकरी पुत्रांना पालकमंत्र्यांचा धीर “शेतकरी बांधव आणि शेतकरी पुत्रांनी घाबरून जाऊ नये. शासन आपल्या पाठीशी आहे.”

— अतुल सावे, पालकमंत्री

🔴मुख्य संपादक: श्री शहाजी वरखिंडे                   मो. 9923072242