🛑 देगलूरमध्ये ‘सेवा संकल्प अभियान’ अंतर्गत पथविक्रेत्यांसाठी लोककल्याण मेळावा.

🛑 देगलूरमध्ये ‘सेवा संकल्प अभियान’ अंतर्गत पथविक्रेत्यांसाठी लोककल्याण मेळावा.

आरोग्य तपासणी शिबिरास उत्स्फूर्त प्रतिसाद; १८२ पथविक्रेत्यांनी घेतला लाभ

शिवगर्जना न्यूज | देगलूर प्रतिनिधी

देगलूर : महाराष्ट्र शासनाच्या निर्देशानुसार आणि ‘सेवा परमोधर्म’ या उक्तीप्रमाणे माननीय पंतप्रधान नरेंद्र मोदी यांच्या संविधानिक पदावरील कारकिर्दीला २५ वर्षे पूर्ण झाल्याच्या निमित्ताने तसेच त्यांच्या वाढदिवसानिमित्त १७ सप्टेंबर ते १७ ऑक्टोबर २०२६ या कालावधीत देगलूर शहरात ‘सेवा संकल्प अभियान’ राबविण्यात येत आहे. या अभियानाचा एक भाग म्हणून देगलूर नगर परिषदेतर्फे नगराध्यक्षा सौ. विजयमाला बालाजी टेकाळे यांच्या मार्गदर्शनाखाली प्रधानमंत्री पथविक्रेता आत्मनिर्भर निधी योजना अंतर्गत देगलूर शहर प्राथमिक आरोग्य केंद्र (UPHC) येथे लोककल्याण मेळावा आयोजित करण्यात आला.

या मेळाव्यात पथविक्रेत्यांसाठी आरोग्य तपासणी शिबिर तसेच क्रेडिट कार्ड वापराबाबत मार्गदर्शन शिबिर घेण्यात आले. कार्यक्रमास नगर परिषद देगलूरचे उपाध्यक्ष श्री. अंकुश देसाई, नगराध्यक्षा प्रतिनिधी श्री. बालाजी टेकाळे, नगर परिषद मुख्याधिकारी श्रीमती निलम कांबळे, नगरसेवक प्रतिनिधी पशाभाई आणि आरोग्य अधिकारी डॉ. आश्विनी गउळकर यांची उपस्थिती होती.

आरोग्य शिबिरात मार्गदर्शन करताना डॉ. आश्विनी गउळकर यांनी पथ विक्रेत्यांना विविध आजारांची लक्षणे, प्रतिबंधात्मक उपाय आणि आरोग्याची काळजी घेण्याबाबत माहिती दिली. नगराध्यक्षा प्रतिनिधी श्री. बालाजी टेकाळे यांनी पथ विक्रेत्यांनी क्रेडिट कार्डचा योग्य वापर करावा, घेतलेल्या रकमेची विहित मुदतीत परतफेड करावी आणि अनावश्यक आर्थिक भुर्दंड टाळावा असे आवाहन केले.

समारोपीय भाषणात नगर परिषद मुख्याधिकारी श्रीमती निलम कांबळे यांनी पथविक्रेत्यांनी दैनंदिन उपजीविकेसोबत आरोग्याबाबतही जागरूक राहण्याचे आवाहन केले. तसेच प्रधानमंत्री पथविक्रेता आत्मनिर्भर निधी योजने अंतर्गत क्रेडिट कार्डच्या वापराबाबत उपस्थितांना सविस्तर मार्गदर्शन केले.

या आरोग्य तपासणी शिबिराचा एकूण १८२ पथविक्रेत्यांनी लाभ घेतला.

🔴मुख्य संपादक: श्री शहाजी वरखिंडे                  मो. 9923072242