🛑 नशामुक्त तरुणाईतूनच घडेल विकसित भारत : प्रा. सारिका बकवाड

🛑 नशामूक्त तरुणाईतूनच घडेल विकसित भारत : प्रा. सारिका बकवाड

विष्णुपुरीत नशामुक्त युवा अभियानातून युवकांमध्ये जनजागृती.

शिवगर्जना न्यूज,

नांदेड प्रतिनिधी

नांदेड : युवा कार्यक्रम व खेळ मंत्रालय, भारत सरकारच्या विकसित भारत संकल्पनेतून राबविण्यात येत असलेल्या नशामुक्त युवा अभियानांतर्गत ग्रामीण टेक्निकल अँड मॅनेजमेंट इन्स्टिट्यूट, विष्णुपुरी, नांदेड येथे नशा विरोधी जनजागृती कार्यक्रम उत्साहात पार पडला.

या कार्यक्रमासाठी प्रा. सारिका बकवाड यांना मार्गदर्शक म्हणून आमंत्रित करण्यात आले होते. यावेळी त्यांनी महाविद्यालयातील युवकांशी संवाद साधत व्यसनमुक्त जीवनाचे महत्त्व स्पष्ट केले.

मार्गदर्शन करताना प्रा. बकवाड म्हणाल्या, देशाचे भविष्य तरुणांच्या हातात आहे. तरुणाई व्यसनांपासून मुक्त राहून शिक्षण, कौशल्य, क्रीडा आणि सर्जनशीलतेकडे वळली तर विकसित भारताची वाट अधिक भक्कम होईल.

व्यसनाची सुरुवात अनेकदा सहज वाटणाऱ्या एका चुकीच्या निर्णयातून होते; मात्र त्याचे दुष्परिणाम केवळ व्यक्तीच्या आरोग्यावरच नव्हे, तर कुटुंब आणि समाजावरही होतात. त्यामुळे युवकांनी स्वतः नशेपासून दूर राहण्यासोबतच मित्र परिवार आणि समाजातही नशा मुक्तीचा संदेश पोहोचवावा असे आवाहन त्यांनी केले.

नशेला नकार देणे म्हणजे केवळ एका व्यसनाला नकार देणे नव्हे, तर आपल्या स्वप्नांना, आपल्या कुटुंबाला आणि आपल्या उज्ज्वल भवितव्याला होकार देणे आहे असा प्रेरणादायी संदेश प्रा. सारिका बकवाड यांनी विद्यार्थ्यांना दिला.

कार्यक्रमा दरम्यान विद्यार्थ्यांमध्ये नशा विरोधी जनजागृती करण्यात आली. उपस्थित युवकांनी नशा मुक्त भारताच्या निर्मितीसाठी योगदान देण्याचा संकल्प केला.

कार्यक्रमास महाविद्यालयाचे प्राचार्य, प्राध्यापक वर्ग, कर्मचारी तसेच विद्यार्थी मोठ्या संख्येने उपस्थित होते. उत्साहपूर्ण वातावरणात कार्यक्रमाची सांगता झाली.

🔴मुख्य संपादक: श्री शहाजी वरखिंडे                  मो. 9923072242