🛑 नांदेड जिल्हा कोरडा दुष्काळ जाहीर करावा व हेक्टरी एक लक्ष रूपये आर्थिक मदत द्यावी— संभाजी ब्रिगेड.

🔴 नांदेड जिल्ह्यात कोरडा दुष्काळ जाहीर करा; हेक्टरी १ लाखांची मदत द्या. 

सोयाबीन-कापूस वाळण्याच्या मार्गावर; संभाजी ब्रिगेडचा प्रशासनाला इशारा अन्यथा तीव्र आंदोलन.

शिवगर्जना न्यूज,

देगलूर प्रतिनिधी

देगलूर : नांदेड जिल्ह्यात यंदा पावसाने मोठी दडी मारल्याने खरीप पिके संकटात सापडली आहेत. गतवर्षीच्या तुलनेत यंदा पावसाची मोठी तूट निर्माण झाली असून, सोयाबीन, कापूस, मूग, उडीद यासह अन्य खरीप पिकांच्या उत्पादनावर गंभीर परिणाम होण्याची भीती निर्माण झाली आहे. त्यामुळे नांदेड जिल्ह्यात तातडीने कोरडा दुष्काळ जाहीर करून शेतकऱ्यांना हेक्टरी १ लाख रुपये आर्थिक मदत द्यावी, अशी मागणी संभाजी ब्रिगेडच्या वतीने करण्यात आली आहे.

या संदर्भात मा. उपजिल्हाधिकारी कार्यालय, देगलूर येथे निवेदन देण्यात आले. निवेदनात म्हटले आहे की, गतवर्षी आजच्या तारखेपर्यंत जिल्ह्यात ८२६ मिलिमीटर पावसाची नोंद झाली होती. यंदा मात्र केवळ ५२१ मिलिमीटर पाऊस झाला आहे. त्यामुळे गतवर्षीच्या तुलनेत यंदा तब्बल ३०५ मिलिमीटर पावसाची तूट असल्याचे निवेदनात नमूद करण्यात आले आहे.

खरीप हंगामाच्या सुरुवातीला काही भागात समाधानकारक पाऊस झाला. मात्र त्यानंतर गेल्या अनेक दिवसांपासून पावसाने दडी मारल्याने शेतकऱ्यांची चिंता वाढली आहे. सध्या सोयाबीनमध्ये शेंगा भरण्याचा आणि कापसाला बोंड लागण्याचा महत्त्वाचा कालावधी असताना पावसाचा खंड पडल्याने हाताशी आलेली पिके वाळण्याच्या मार्गावर आहेत. त्यामुळे शेतकऱ्यांच्या उत्पादनावर मोठे संकट ओढवले आहे.

भारतीय हवामान विभागाने गेल्या महिन्यात दोन वेळा यलो अलर्ट जाहीर केला होता. मात्र अलर्टच्या काळात अपेक्षित पाऊस झाला नसल्याने शेतकऱ्यांच्या पदरी पुन्हा निराशाच आली. पाऊस वेळेवर न पडल्याने सोयाबीन, कापूस तसेच मूग, उडीद आणि इतर खरीप पिके कोमेजत आहेत.

या पार्श्वभूमीवर शासनाने परिस्थितीचे गांभीर्य ओळखून नांदेड जिल्ह्यात तातडीने कोरडा दुष्काळ जाहीर करावा, शेतकऱ्यांसाठी आवश्यक उपाययोजना कराव्यात आणि हेक्टरी १ लाख रुपये आर्थिक मदत द्यावी, अशी मागणी करण्यात आली आहे.

शेतकऱ्यांच्या मागण्यांकडे शासनाने दुर्लक्ष केल्यास संभाजी ब्रिगेडच्या वतीने तीव्र आंदोलन छेडण्यात येईल, असा स्पष्ट इशाराही निवेदनातून देण्यात आला आहे.

यावेळी जिल्हा अ. जेजेराव पाटील करडखेडवाडीकर, दत्तू पाटील, हणमंतराव पाटील, अमृत पाटील, देविदास पाटील बालाजी पाटील, भगवान पाटील, शहाजी पाटील, गजानन पाटील, संतोष डोंगळे, कपिल कालिंगवार, शुभम इंगळे शहाजी वरखिंडे यांची उपस्थित होती.

🔴मुख्य संपादक: श्री शहाजी वरखिंडे                  मो. 9923072242