🛑 साहित्यिकांची मांदियाळी, कर्तृत्वाचा गौरव; सिंधुदुर्गनगरीत रंगला दिमाखदार सोहळा

🛑 साहित्यिकांची मांदियाळी, कर्तृत्वाचा गौरव; सिंधुदुर्गनगरीत रंगला दिमाखदार सोहळा.. 

शिवगर्जना न्यूज, 

9923072242

सिंधुदुर्गनगरी – साहित्य, कला, सामाजिक कार्य, पत्रकारिता, सांस्कृतिक क्षेत्र आणि विविध क्षेत्रांत उल्लेखनीय योगदान देणाऱ्या कर्तृत्ववानांचा सन्मान, साहित्यिकांची मांदियाळी आणि पुस्तक प्रकाशनाचा सोहळा अशा त्रिवेणी संगमाने ‘कोकण कला साहित्य गौरव संमेलन–सिंधुदुर्गनगरी २०२६’ उत्साहात आणि दिमाखात पार पडले. महाराष्ट्र राज्य पत्रकार संघ, मुंबई, कोकण बुक ऑफ रेकॉर्ड्स आणि यशश्री फाउंडेशन, सिंधुदुर्ग यांच्या संयुक्त विद्यमाने ९ ऑगस्ट रोजी ओरोस येथील पत्रकार भवनाच्या सभागृहात या सोहळ्याचे आयोजन डॉ.बी. एन.खरात यांनी केले . 

या भव्य सोहळ्यात विविध राज्यांतून आलेले कलाकार, साहित्यिक, सामाजिक कार्यकर्ते, पत्रकार, कलावंत तसेच विविध क्षेत्रांत उल्लेखनीय कार्य करणाऱ्या सुमारे शंभर कर्तृत्ववान व्यक्तींना पुरस्कार देऊन गौरविण्यात आले. सामाजिक परिवर्तन, मानवता, सामाजिक बांधिलकी, निःस्वार्थ सेवा आणि साहित्य-कला क्षेत्रातील उल्लेखनीय योगदानाची यावेळी दखल घेण्यात आली.

या सोहळ्याच्या निमित्ताने वर्दे गावचे सुपुत्र आयु. बळीराम लाडू कदम यांच्या ‘कन्वर्जन फॉर बुद्धिझम’ आणि ‘ब्युटी इन एथिक्स’ या तत्त्वज्ञानविषयक पुस्तकांचेही मान्यवरांच्या उपस्थितीत प्रकाशन करण्यात आले. या पुस्तकांमधून धर्मांतर, तत्त्वज्ञान, नैतिक मूल्ये आणि सामाजिक परिवर्तन यांसारख्या महत्त्वपूर्ण विषयांवर वैचारिक मांडणी करण्यात आली आहे.

पुस्तक प्रकाशनावेळी समृद्धी पब्लिकेशनचे संचालक डॉ. बी.एन. खरात यांनी पुस्तकांच्या आशयाविषयी विचार मांडताना चार्वाक, ॲरिस्टॉटल आणि रोमन विचारांचा मानवी जीवनावर तसेच युवकांच्या विचारविश्वावर होणारा प्रभाव अधोरेखित केला. बदलत्या सामाजिक परिस्थितीत तत्त्वज्ञान आणि नैतिक मूल्यांचे महत्त्व समजून घेण्यासाठी ही पुस्तके उपयुक्त ठरतील, असे त्यांनी नमूद केले.

लेखक बळीराम कदम यांनी आपल्या मनोगतात डॉ. बाबासाहेब आंबेडकर यांच्या धर्मांतरामागील वैचारिक भूमिका मांडत धर्मांतराच्या निर्णयाशी संबंधित अनेक प्रश्न पुस्तकातून उपस्थित केले असल्याचे सांगितले. तसेच ‘नीतीने समाज घडतो आणि नीती नसेल तर अधर्म वाढतो’ हा विचार ‘ब्युटी इन एथिक्स’ या पुस्तकातून मांडण्यात आल्याचे त्यांनी स्पष्ट केले.

या सोहळ्यास संगीतकार अतुल दिवे, अभिनेत्री श्रुती पारकर, जि. प. अध्यक्ष प्रमोद कामत, विभागीय चौकशी अधिकारी विजय चव्हाण, ज्येष्ठ दशावतार कलावंत दादा राणे कोनस्कर, डॉ. बी. एन. खरात, दादा मडकईकर, सौ. ऋतुजा राजेश परब यांच्यासह विविध क्षेत्रांतील मान्यवरांची प्रमुख उपस्थिती होती. कार्यक्रमाचे सूत्रसंचालन व आभार प्रदर्शन प्रा. नरेंद्रकुमार चव्हाण यांनी केले. त्यांच्या प्रभावी सूत्रसंचालनामुळे कार्यक्रमाला विशेष रंगत आली.

विविध राज्यांतील कलाकार व साहित्यिकांची उपस्थिती, सुमारे शंभर कर्तृत्ववानांचा पुरस्काराने गौरव आणि दोन वैचारिक पुस्तकांचे प्रकाशन अशा विविध उपक्रमांनी सजलेला हा सोहळा सिंधुदुर्गच्या साहित्यिक, सांस्कृतिक व सामाजिक क्षेत्रात लक्षवेधी ठरला. साहित्यप्रेमी, रसिक, सामाजिक कार्यकर्ते आणि विविध क्षेत्रांतील मान्यवरांच्या उपस्थितीने कार्यक्रमाला विशेष रंगत आली.

🔴मुख्य संपादक: श्री शहाजी वरखिंडे

मो. 9923072242