🛑 बहिऱ्या पंचायत समितीविरोधात शेतकरी संघटनेचा ‘ढोल बजाव’ आंदोलनाचा इशारा – रमेश कदम पाटील

🔴 बहिऱ्या पंचायत समिती विरोधात शेतकरी संघटनेचा ‘ढोल बजाव’ आंदोलनाचा इशारा – रमेश कदम पाटील

शिवगर्जना न्यूज,

किनवट : अमोल भरणे

नवव्या मदत कक्ष दिनी ४० नागरिकांच्या तक्रारी प्रशासनासमोर; आठ दिवसांत कार्यवाही न झाल्यास आंदोलन

शिवराज्याभिषेक दिनाच्या औचित्याने शेतकरी संघटनेच्या वतीने पंचायत समिती, किनवट येथे सुरू करण्यात आलेल्या ‘मदत कक्ष’ या अभिनव उपक्रमाचा नववा मदत कक्ष दिन उत्साहात पार पडला. या मदत कक्षाच्या माध्यमातून तालुक्यातील शेतकरी, शेतमजूर व सर्वसामान्य नागरिकांच्या विविध शासकीय विभागांशी संबंधित अडचणी सोडविण्यासाठी दर मंगळवारी मदत केली जाते.

सद्याच्या मदत कक्षाचा लाभ घेत सुमारे ४० नागरिकांनी आपल्या तक्रारी व समस्या शेतकरी संघटनेमार्फत प्रशासनापुढे मांडल्या. या मदत कक्षाचे अध्यक्षस्थान शेतकरी संघटनेचे नांदेड जिल्हाध्यक्ष रमेश कदम पाटील यांनी भूषविले. प्रमुख पाहुणे म्हणून निवृत्त पोलीस जमादार विठ्ठलराव दांडेगावकर उपस्थित होते. यावेळी शेतकरी संघटनेच्या दिव्यांग आघाडीचे तालुका सचिव विजयभाऊ बोईनवाड, भगवान गंगाराम मारपवार, प्रमोद सुभाष शिवनीतवार, तक्षक नामदेव उगले, विठ्ठलराव रामजी दांडेगावकर, हुशन्ना काशीराम हळदकर, अमोल बाबुराव भरणे यांच्यासह संघटनेचे अनेक पदाधिकारी व कार्यकर्ते उपस्थित होते.

गटविकास अधिकारी, पंचायत समिती किनवट यांना यापूर्वी सादर केलेल्या निवेदनाच्या अनुषंगाने दुसरे स्मरणपत्र देण्यात आले. या स्मरणपत्रात मदत कक्षामार्फत प्राप्त होणाऱ्या सर्व तक्रारींचे कालमर्यादेत निवारण करण्यासाठी स्वतंत्र व्यवस्था निर्माण करणे, माहिती अधिकार अधिनियमाच्या कलम ४ नुसार अधिकारी व कर्मचाऱ्यांची माहिती कार्यालयाच्या दर्शनी भागात प्रसिद्ध करणे, कार्यालयीन समन्वयासाठी नोडल अधिकारी नियुक्त करणे, अधिकारी-कर्मचाऱ्यांच्या उपस्थिती व वेळपालनावर प्रभावी नियंत्रण ठेवणे, प्रत्येक नागरिकाच्या तक्रारीची संवेदनशीलतेने दखल घेऊन वेळेत निवारण करणे तसेच दि. १६ जून २०२६ रोजीच्या मूळ निवेदनातील सर्व मुद्द्यांवर करण्यात आलेल्या कार्यवाहीचा लेखी अहवाल शेतकरी संघटनेला देण्याची मागणी करण्यात आली आहे.

बोलतांना रमेश कदम पाटील यांनी सांगितले की, “सर्वसामान्य नागरिकांना न्याय मिळावा आणि पंचायत समितीचे प्रशासन अधिक पारदर्शक, जबाबदार व लोकाभिमुख व्हावे, या उद्देशाने शेतकरी संघटना मदत कक्ष चालवत आहे. मात्र वारंवार निवेदने देऊनही मागण्यांवर कोणतीही ठोस कार्यवाही होत नसल्याने नागरिकांमध्ये तीव्र नाराजी आहे.”

पुढे इशारा देताना सांगितले की, “येत्या आठ दिवसांत मागण्यांवर समाधानकारक कार्यवाही झाली नाही, तर मंगळवार दि. ०४ ऑगस्ट २०२६ रोजी सकाळी ११.०० वाजता पंचायत समिती कार्यालय, किनवट येथे शेतकरी संघटनेच्या वतीने लोकशाही, संविधानिक व शांततापूर्ण मार्गाने ‘ढोल बजाव आंदोलन’ करण्यात येईल. या आंदोलनाद्वारे प्रशासनाचे लक्ष सर्वसामान्य नागरिकांच्या प्रलंबित प्रश्नांकडे वेधण्यात येईल.”

या इशाऱ्यामुळे पंचायत समिती प्रशासन पुढील काही दिवसांत काय भूमिका घेते, याकडे तालुक्यातील नागरिकांचे लक्ष लागले आहे.

🔴मुख्य संपादक: श्री शहाजी वरखिंडे

मो. 9923072242