🛑 नरसीतील दोन लॉजवर पोलिसांची धाड; कथित वेश्याव्यवसायाचा पर्दाफाश

🔴 नरसी येथील दोन लॉजवर चालू असलेल्या वेश्याव्यवसायवर पोलीसांची धाड.

◾नांदेड स्थानिक गुन्हा शाखेने ताबडतोब केला वेश्या व्यवसायाचा पर्दाफाश, लॉज चालकासह १० जणांविरुद्ध गुन्हा दाखल.

शिवगर्जना न्यूज,

सिध्दार्थ कांबळे

 नांदेड जिल्ह्यातील नायगाव तालुक्यातील नरसी येथे बसस्थानक समोरील आनंद लॉज आणि आशीर्वाद लॉजवर पोलिसांनी धाड टाकून सुरू असलेल्या वेश्या व्यवसायाचा पर्दाफाश केला आहे. शनिवारी झालेल्या या कारवाईत लॉज मालक पांडुरंग शिवराम श्रीरगिरे याच्यासह १० जणांविरुद्ध गुन्हा दाखल केला आहे. स्थानिक गुन्हा शाखेअंतर्गत असलेल्या अनैतिक मानवी वाहतूक प्रतिबंधक कक्षाने ही कारवाई केली आहे.

पोलीस पथकाला मिळालेल्या खात्रीशीर माहितीनुसार रामतीर्थ पोलीस ठाणे हद्दीतील नरसी बस स्थानकासमोरील आशीर्वाद लॉज आणि आनंद लॉज येथील मालक पांडुरंग शिवराम शिरगिरे हा बाहेरील राज्यातील महिलांना आणून त्यांच्याकडून बळजबरीने वेश्या व्यवस्था करून घेत आहे. या माहितीच्या आधारे पोलीस अधीक्षक डॉ.निलाभ रोहन, बिलोलीचे पोलीस उपाधीक्षक श्याम पानेगावकर यांच्या नेतृत्वाखाली विशेष पथक तयार करण्यात आले.

कारवाईदरम्यान पोलिसांनी शासकीय पंचासमक्ष दोन सामाजिक कार्यकर्त्यांना बोगस गिऱ्हाईक म्हणून सदर लॉजवर पाठवले. तेथे जाऊन अनैतिक कृत्यासाठी इसम निश्चित करताच पोलिसांना ठरविल्याप्रमाणे त्यांनी इशारा केला. इशारा मिळताच पोलिसांनी या दोन्ही लॉजवर छापा मारला. त्यावेळी राहुल कोलते, विश्वंभर गाडे रा.चिलपिंपरी मुदखेड, बालाजी सूर्यवंशी, खाकीबा सूर्यवंशी, पांडुरंग शिवराम शिरगिरे, नरसिंग ठाकूर उर्फ परदेशी सर्व रा.नरसी, प्रवीण वारणलवार, कृष्णा देशपिठवार रा.तेल्लूर, वेंकट नारे रा. नरसी आणि विकी इंदुरकर रा.हडको हे आढळून आले.

या कारवाईत परिविक्षाधीन पोलीस उपधीक्षक वैभव पडवळ, गुन्हा शाखेचे पोलीस निरीक्षक अतुल भोसले, रामतीर्थ पोलीस ठाण्याचे सहायक पोलीस निरीक्षक विक्रम हराळे, उपनिरीक्षक साईनाथ पुयड, मिलिंद सोनकांबळे, पोलीस अंमलदार कौठेकर, बामणे, शेख उमर, लोसरवार, कुलथे, अझरुद्दीन बिरादार,स्वामी, माने, राठोड, जोंधळे, जाधव, लोणे, देवकते, मापोकॉ सूर्यवंशी यांच्यासह अनैतिक मानवी वाहतूक प्रतिबंधक कक्षाच्या महिला उपनिरीक्षक अश्विनी गायकवाड, पोहेकॉ मोरे, केंद्रे यांचा समावेश होता.

या कारवाईदरम्यान एकूण सात पीडित महिलांची सुटका करण्यात आली.वध या महिलांना पैशाचे अमिष दाखवून बळजबरीने अनैतिक कृत्य करून घेत होते. या कारवाईदरम्यान पोलिसांनी रोख रक्कम,मोबाईल फोन असा एकूण ०२ लाख ०४ हजार ८० रुपये किमतीचा मुद्देमाल जप्त केला आहे. याप्रकरणी महिला पोलीस उपनिरीक्षक अश्विनी गायकवाड यांच्या तक्रारीवरुन लॉजमालकासह दहा जणांविरुद्ध रामतीर्थ पोलीस ठाणे येथे गुन्हा दाखल करण्यात आला आहे. नांदेडमध्ये अशाच एका कारवाईदरम्यान आसाम येथील महिलांची सुटका करण्यात आली होती.

🔴मुख्य संपादक: श्री शहाजी वरखिंडे

मो. 9923072242