🛑 ‘शासन नागरिकांच्या दारी’ संकल्पनेला बळ; नायगावातील महसूल समाधान शिबिराला हजारोंचा उत्स्फूर्त प्रतिसाद

🔴 ‘शासन नागरिकांच्या दारी’ संकल्पनेला बळ; नायगावातील महसूल समाधान शिबिराला हजारोंचा उत्स्फूर्त प्रतिसाद

एकाच छताखाली विविध शासकीय सेवा; आमदार राजेश पवार यांच्या हस्ते उद्घाटन.

शिवगर्जना न्यूज,

नायगाव प्रतिनिधी : बाळासाहेब पांडे

महसूल विभागाच्या लोकाभिमुख प्रशासनाचा प्रत्यय देणारे ‘छत्रपती शिवाजी महाराज महसूल समाधान शिबिर अभियान’ बुधवारी (दि. २२) नायगाव येथील कुसुम मंगल कार्यालयात मोठ्या उत्साहात पार पडले. महाराष्ट्र शासनाच्या महसूल विभागाच्या पुढाकाराने तसेच नायगाव विधानसभा क्षेत्रातील विविध शासकीय विभागांच्या संयुक्त विद्यमाने आयोजित करण्यात आलेल्या या भव्य शिबिराला नायगाव, उमरी आणि धर्माबाद तालुक्यातील हजारो नागरिकांनी उपस्थित राहून उत्स्फूर्त प्रतिसाद दिला.

या शिबिराचे उद्घाटन व अध्यक्षस्थान नायगावचे आमदार राजेश पवार यांनी भूषविले. मुख्यमंत्री देवेंद्र फडणवीस यांच्या जन्मदिनाचे तसेच माजी उपमुख्यमंत्री स्व. अजितदादा पवार यांच्या जयंतीचे औचित्य साधून आयोजित करण्यात आलेल्या या उपक्रमामुळे शासनाच्या विविध योजना आणि सेवा थेट नागरिकांच्या दारी पोहोचविण्याचा उद्देश यशस्वीपणे साध्य झाल्याचे चित्र पाहायला मिळाले.

शिबिरामध्ये महसूल, पंचायत राज, कृषी, आरोग्य, परिवहन, शिक्षण, ग्रामविकास, सामाजिक न्याय, सेतू सुविधा केंद्र, महिला व बालविकास, अन्न व नागरी पुरवठा, महावितरण, जलसंपदा आदी विविध विभागांचे स्वतंत्र कक्ष उभारण्यात आले होते. नागरिकांना एकाच ठिकाणी विविध शासकीय सेवा उपलब्ध करून देण्यात आल्याने विविध कार्यालयांचे हेलपाटे मारण्याची गरज भासली नाही.

यावेळी उत्पन्न, जात, रहिवासी, ज्येष्ठ नागरिक, अधिवास आदी विविध दाखले व प्रमाणपत्रांचे वितरण करण्यात आले. तसेच शासनाच्या विविध कल्याणकारी योजनांची माहिती देण्यात आली. शेतकरी, विद्यार्थी, महिला, ज्येष्ठ नागरिक, दिव्यांग आणि सर्वसामान्य नागरिकांच्या विविध अर्जांचा स्वीकार करून अनेक प्रकरणांचा जागेवरच निपटारा करण्यात आला.

आमदार राजेश पवार यांनी आपल्या मार्गदर्शनात शासनाच्या योजनांचा लाभ प्रत्येक पात्र नागरिकापर्यंत पोहोचविण्यासाठी प्रशासनाने अधिक संवेदनशील व तत्पर राहण्याचे आवाहन केले. शासनाच्या सेवा नागरिकांच्या दारी पोहोचविण्याच्या संकल्पनेतून अशा प्रकारची शिबिरे अत्यंत उपयुक्त ठरत असून, सर्व विभागांनी समन्वयाने काम करून जनतेच्या अडचणी तातडीने सोडवाव्यात, असे त्यांनी सांगितले.

शिबिरात विविध विभागांच्या अधिकाऱ्यांनी नागरिकांच्या तक्रारी ऐकून त्यांचे निराकरण केले. लाभार्थ्यांना विविध योजनांचे मंजुरीपत्र, प्रमाणपत्रे व आवश्यक कागदपत्रांचे वितरण करण्यात आले. महिला, शेतकरी, विद्यार्थी आणि ज्येष्ठ नागरिकांनी या उपक्रमाचे स्वागत करत शासनाच्या सेवा एकाच ठिकाणी उपलब्ध झाल्याबद्दल समाधान व्यक्त केले.

यावेळी महसूल विभागासह विविध शासकीय विभागांचे अधिकारी, कर्मचारी, लोकप्रतिनिधी, पदाधिकारी आणि मोठ्या संख्येने नागरिक उपस्थित होते. नागरिकांच्या प्रचंड प्रतिसादामुळे ‘शासन आपल्या दारी’ ही संकल्पना प्रत्यक्षात प्रभावीपणे राबविण्यात प्रशासनाला यश आल्याचे चित्र या शिबिरातून पाहायला मिळाले.

🔴मुख्य संपादक: श्री शहाजी वरखिंडे

मो. 9923072242