🛑 नायगाव तालुक्यात दिवस-रात्र मातीचा व मुरमाचा कहर; महसूल प्रशासन कोमात मुरूम वाले जोमात.

🔴 नायगाव तालुक्यात दिवस-रात्र मातीचा व मुरमाचा कहर; महसूल प्रशासन कोमात मुरूम वाले जोमात. 

शिवगर्जना न्यूज, 

उपसंपादक निळकंठ पाटील जाधव

नांदेड जिल्ह्यातील नायगाव तालुक्यातील गोदावरी नदीच्या काठावर बरबडा महादेव मंदिर येथे दिवस-रात्र सुरू असलेल्या माती उत्खननामुळे प्रशासनाच्या कार्यक्षमतेवर गंभीर प्रश्नचिन्ह निर्माण झाले आहे. परवानगी दोनशे ब्रासची आणि उत्खनन हजारो ब्रास हा प्रकार सातत्याने चालू असून मुंडकर या नावाने दोनशे ब्रास परवानगी असली तरी एक राजकीय पक्षाचा जिल्हा प्रमुख आपले नातेवाईक येथे उभे करून दिवस रात्र हजारो ब्रास माती उत्खनन करून शासनाच्या डोळ्यात धूळ फेकण्याचा प्रकार उघड माथ्याने करत असल्याचे चित्र चालू आहे. यावर कार्यवाही न करता महसूल खाते चूप तर पोलिस खाते गप्प आहे.

अगोदरच वाळू उपशाच्या मुद्द्यावर महायुती मधील एका राजकीय पक्षातील महाशय आधीच वादग्रस्त ठरलेल्या नेत्याने पडद्या आडून हे काम हाती घेऊन एकीकडे पर्यावरणाची धुरा हाती घेऊन काम करायचे आणि खायचे दात वेगळे दाखवत आहे. तालुक्यात आता मुरूम व माती उत्खननाने अक्षरशः उग्र रूप धारण केले असून, महसूल व पोलिस प्रशासन मात्र बघ्याची भूमिका घेत असल्याचा आरोप ग्रामस्थांमधून होत आहे.

तालुक्यात अनेक ठिकाणी ‘कमी परवानगी आणि जास्त उत्खनन’ हा प्रकार नित्याचा झाला आहे. नियमांच्या चौकटीत राहून काम करण्याऐवजी परवानगीचा केवळ आडोसा घेत मोठ्या प्रमाणावर माती उपसा केला जात असल्याचे चित्र स्पष्टपणे दिसत आहे. विशेष म्हणजे, हा सर्व प्रकार उघडपणे-दिवसा आणि रात्रीही-सुरू असूनही संबंधित यंत्रणा कारवाईसाठी पुढे येताना दिसत नाही. स्थानिकांच्या मते, “माती उत्खनन करणाऱ्यांना कोणाचीही भीती उरलेली नाही. ना पोलिसांचा धाक, ना महसूल प्रशासनाची भीती.” त्यामुळे या मागे ‘आशीर्वाद’ असल्याची चर्चा रंगत आहे. तहसीलदार गायकवाड यांच्या कार्यपद्धतीवर ही बोट ठेवले जात असून, त्यांच्या काळात अवैध उत्खननाला उधाण आल्याचा आरोप होत आहे.

दरम्यान, सामान्य नागरिक एखादा प्रश्न उपस्थित केला किंवा तक्रार केली, तर त्यांच्यावर अब्रुनुकसानीच्या कारवाईची भाषा वापरणारे अधिकारीच अशा गंभीर प्रकाराकडे डोळेझाक करत असल्याने संताप व्यक्त केला जात आहे. कायदा सर्वांसाठी समान असताना काहींना मोकळीक आणि काहींना दडपशाही, असा दुहेरी मापदंड का? असा सवाल नागरिक उपस्थित करत आहेत. अवैध उत्खननामुळे पर्यावरणाचा समतोल बिघडत असून, शेती जमीन व रस्त्यांचेही मोठे नुकसान होत आहे. तरीही प्रशासनाच्या निष्क्रियतेमुळे हा प्रकार अधिकच वाढत चालला आहे.

कारवाईचा सवाल; प्रशासन झोपेतच. 

नायगाव तालुक्यात महसूल प्रशासनाची मुख्य संपत्ती पोलिसांची आर्थिक संपत्ती नागरिकांतून मोठ्या प्रमाणात बोलत असल्याचे चित्र दिसून येत आहे.

तालुक्यातील या खुलेआम सुरू असलेल्या प्रकारावर तात्काळ कठोर कारवाई होणे गरजेचे असताना महसूल व पोलिस यंत्रणा नेमकी कोणाच्या दबावाखाली आहे, असा सवाल उपस्थित होत आहे. जिल्हा प्रशासनाने स्वतःहून लक्ष घालून दोषींवर कठोर कारवाई करावी, अशी मागणी आता जोर धरू लागली आहे.

🔴मुख्य संपादक: श्री शहाजी वरखिंडे 9923072242