🛑 ग्रामीण रुग्णालयाच्या अँब्युलन्स मध्ये ‘पत्त्याचा डाव’ — रुग्णसेवेचा खेळखंडोबा

🔴 नायगावच्या ग्रामीण रुग्णालयाच्या अँब्युलन्स मध्ये ‘पत्त्याचा डाव’ — रुग्णसेवेचा खेळखंडोबा. 

ॲम्बुलन्सचा वापर पत्त्यांसाठी नागरिकांतून तीव्र संतापाची लाट. 

शिवगर्जना न्यूज, 

प्रतिनिधी / बाळासाहेब पांडे 

नांदेड जिल्ह्यातील नायगाव येथील ग्रामीण रुग्णालयात आरोग्य सेवेच्या हलगर्जीपणाचा धक्कादायक प्रकार समोर आला आहे. रुग्णांसाठी अत्यावश्यक असलेली रुग्णवाहिका (ॲम्बुलन्स) रुग्णांऐवजी कर्मचाऱ्यांकडून पत्त्यांचा डाव मांडण्यासाठी वापरली जात असल्याचे दृश्य नागरिकांच्या लक्षात आले.

या प्रकारामुळे आरोग्य यंत्रणेच्या निष्काळजीपणावर प्रश्नचिन्ह निर्माण झाले आहे. विशेष म्हणजे, कालच मुखेड तालुक्यात ॲम्बुलन्स वेळेवर न मिळाल्यामुळे एका गरोदर महिलेची प्रसूती रस्त्यातच झाली होती. अशा पार्श्वभूमीवर नायगावमधील प्रकार अधिकच संतापजनक ठरतो.

रुग्णसेवा हे कोणत्याही रुग्णालयाचे मूलभूत कर्तव्य असताना, अशा प्रकारची बेफिकिरी ही गंभीर बाब ठरते. रुग्णवाहिकेचा करमणुकीसाठी होणारा गैरवापर म्हणजे रुग्णांच्या जीवाशी खेळ असल्याची भावना नागरिकांमध्ये आहे.

नागरिकांतून तीव्र प्रतिक्रिया उमटत असून संबंधित कर्मचाऱ्यांवर कठोर कारवाई व्हावी, तसेच रुग्णालयाच्या प्रमुखांचीही जबाबदारी निश्चित करून त्यांच्यावर चौकशी करण्यात यावी, अशी मागणी जोर धरू लागली आहे.

शिवगर्जना न्यूज संपादक : श्री शहाजी वरखिंडे बातम्या व जाहिराती साठी संपर्क 🗣📲📞(9923072242)