🛑 भारतीय मराठा महासंघ – तेलंगणा येथे २५ वे रौप्य महोत्सवी वर्ष थाटामाटात साजरे.

🔴 भारतीय मराठा महासंघ – तेलंगणा येथे २५ वे रौप्य महोत्सवी वर्ष थाटामाटात साजरे. 

शिवगर्जना न्यूज, 

हैदराबाद – 

भारतीय मराठा महासंघ – तेलंगणाने हैदराबाद येथील भारतीय विद्या भवन येथे आपला २५ व्या वर्षातील रौप्य महोत्सव वर्ष मोठ्या उत्साहात आणि सांस्कृतिक अभिमानाने दि.२९ जून २०२५ रोजी साजरा केला. “जो मराठी तो मराठा” या ब्रीद वाक्याने तेलंगणातील मराठी समुदायाला एकत्र आणण्याच्या आणि त्यांची सेवा करण्याच्या संघटनेच्या सामाजिक प्रवासात हा महत्त्वपूर्ण प्रसंग एक महत्त्वाचा टप्पा ठरला.

जहीराबाद खासदार बी.बी.पाटील व तेलंगना युनिव्हर्सिटीचे व्हाईस चॅन्सेलर प्रा.बी.जे.राव. भारतीय मराठा महासंघाचे राष्ट्रीय सरचिटणीस व प्रवक्ता राजन गावंड, राष्ट्रीय उपाध्यक्ष जयदीप वरखिंडे, श्रीनिवास घार्गे, कोषाध्यक्ष राम शिंदे यांची प्रमुख उपस्थिती होती.

खासदार बी.बी.पाटील यांनी तेलंगणातील मराठी समुदायाच्या ऐक्याचे आणि समग्र विकासाचे महत्त्व अधोरेखित करत भारतीय मराठा महासंघाच्या पदाधिकाऱ्यांचे कोतुक केले. व्हाईस चॅन्सेलर प्रा.बी.जे.राव राष्ट्र उभारणी आणि शैक्षणिक उत्कृष्टता मध्ये तरूणाच्या महत्त्वपूर्ण भूमिकेवर प्रकाश टाकत छत्रपती शिवरायाच्या जात धर्म सहिष्णूतेच्या धोरणा नुसार कार्य करणाऱ्या भारतीय मराठा महासंघाचे अभिनंदन केले. 

 प्रमुख पाहूण्याचा राष्ट्रीय नेत्यानी पारंपारिक शाल आणि शौर्य नेतृत्व आणी एकतेचे प्रतीक असलेल्या छत्रपती शिवाजी महाराजांच्या प्रतिमा देऊन आदर पूर्वक सत्कार केला. 

भारतीय मराठा महासंघाचे राष्ट्रीय उपाध्यक्ष श्रीनिवास घार्गे यांच्या मार्गदर्शनाखाली कार्यक्रमाचे, उत्सवाचे आयोजन करण्यात आले. यासाठी तेलंगणा प्रदेश अध्यक्ष सुदेश पाटील, सरचिटणीस चंद्रशेखर देशपांडे, महिला प्रदेश अध्यक्षा डाॅ.पूनम नोमुलवार, युवा प्रदेश अध्यक्ष बाजीराव भोसले, मनोज मोगलागिद्दी, श्री दत्तात्रेय बेने, श्रीमती रागिनी रविकिरण, श्रीमती अश्विनी पतंगे, श्रीधर लोखंडे, श्रीमती सुनिता बिरादार ज्यानी या भव्य कार्यक्रमाच्या आयोजनात आपल्या असंख्य सहकाऱ्यांसमवेत महत्त्वाची भूमिका बजावली. उपस्थित मराठी कुटुंबांची हैदराबादमधील ही संध्याकाळ एका समृद्ध सांस्कृतिक कार्यक्रमाने संपन्न झाली, यावेळी श्री. सुहास बर्वे लिखित आणि दिग्दर्शित एक मनमोहक कौटुंबिक मराठी नाटक – “काय झालं ? बाळ रडत होतं…” व श्रीमती भाग्यश्री पिळणकर (मेंटर – इंडियन आयडॉल) आणि श्री म्युझिकल ग्रुपच्या मराठी सुमधुर संगीताचा आत्म्याला भिडणारा एक उत्कट संगीतमय कार्यक्रम संपन्न झाला. 

गेल्या २५ वर्षात भारतीय मराठा महासंघाच्या तेलंगणा पदाधिकाऱ्यांनी केलेल्या अथक सेवेबद्दल, समुदाय उभारणीसाठी आणि सांस्कृतिक जतनासाठी राष्ट्रीय नेत्यांनी त्यांचे कौतुक केले आणि त्याला संघटनेच्या इतिहासातील एक अभिमानास्पद आणि प्रेरणादायी अध्याय म्हटले.

हा रौप्य महोत्सवी उत्सव तेलंगणामधील मराठी एकता, संस्कृती आणि वारशाचा अभिमानास्पद पुरावा होता.

शिवगर्जना न्यूज संपादक : श्री शहाजी वरखिंडे बातम्या व जाहिराती साठी संपर्क 🗣📲📞(9923072242)