🛑 १४ कोटी तक्रारी च्या भ्रष्टाचार प्रकरणी चौकशी नाही, अन दोषी मोकाट.

🛑 १४ कोटी तक्रार भ्रष्टाचार प्रकरणी चौकशी नाही तर दोषी मोकाट. 

🎯  तक्रारीच्या वर्ष पूर्तीला केक कापून निषेध करणार. 

शिवगर्जना न्यूज, 

किनवट /अनील बंगाळे

किनवट : किनवट तालुक्यातील गौण खनिज (रॉयल्टी) आणि शासन कपातीच्या १४ कोटी रुपये रकमेतील भ्रष्टाचाराच्या तक्रारीवर वर्षभर उलटूनही कोणतीही चौकशी करण्यात आलेली नाही, म्हणून सामाजिक कार्यकर्ते रामदास अंबादास पवार उर्फ बाळू पाटील यांनी संतप्त प्रतिक्रिया व्यक्त करत दि. ४ जुलै २०२५ रोजी तक्रारीचा “वाढदिवस केक कापून” साजरा करण्याचा इशारा दिला आहे.

०४ जुलै २०२४ रोजी त्यांनी जिल्हा परिषद, नांदेड येथे सदर भ्रष्टाचाराबाबत तक्रार दाखल केली होती. या तक्रारीसंदर्भात त्यांनी वेळोवेळी पुरावे सादर करून पाठपुरावा केला, तरीही प्रशासनाकडून कोणतीही ठोस कारवाई झालेली नाही. उलट, त्यांच्याकडून ५०० रुपयाच्या बॉन्डवर “तक्रार खोटी ठरल्यास शिक्षा भोगण्यास तयार आहे” असे स्पष्ट लेखी दिले असतानाही, प्रशासनाने ती गंभीरतेने घेतलेली नाही, असा आरोप त्यांनी निवेदनात केला आहे.

तक्रारदाराने आरोप केला की, ६० ते ७० ग्रामसेवक या प्रकरणात सामील असून दलित वस्ती आणि तांडावस्ती विकास योजनांमधून मोठ्या प्रमाणावर गैरव्यवहार झाला आहे. एवढेच नव्हे तर, संबंधित ग्रामपंचायतींच्या बँक खात्यांचे स्टेटमेंट ही मागील एक वर्षात उपलब्ध करून देण्यात आलेले नाही, ही बाब अत्यंत गंभीर व लज्जास्पद असल्याचे त्यांनी म्हटले आहे.

यावर्षी तक्रारीला एक वर्ष पूर्ण होत असताना देखील प्रशासनाने कुठलीही चौकशी पूर्ण केली नसल्यामुळे, त्यांनी जिल्हा परिषद कार्यालयात तक्रारीचा वाढदिवस केक कापून साजरा करण्याचा निर्णय घेतला आहे. या अनोख्या निषेधात मुख्य कार्यकारी अधिकाऱ्यांनीही सहभागी व्हावे, असे आवाहन बाळू पाटील पवार यांनी आपल्या निवेदनातून केले आहे.

शिवगर्जना न्यूज संपादक : श्री शहाजी वरखिंडे बातम्या व जाहिराती साठी संपर्क 🗣📲📞(9923072242)