🛑 देगलूर महाविद्यालयात संविधान मार्गदर्शन सत्र संपन्न.

🔴 देगलूर महाविद्यालयात भारतीय संविधानावर मार्गदर्शन सत्र संपन्न.

संविधानाचे जतन व संवर्धन करणे हे प्रत्येक भारतीयाचे आद्य कर्तव्य – प्रा. डॉ. रत्नाकर लक्षटे.

शिवगर्जना न्यूज,

देगलूर प्रतिनिधी 9923072242

देगलूर, दि. १७ ऑक्टोबर : अडत व्यापारी शिक्षण संस्था संचलित देगलूर महाविद्यालय, देगलूर येथील स्पर्धा परीक्षा मार्गदर्शन केंद्राच्या वतीने शनिवार, दि. १७ ऑक्टोबर २०२६ रोजी ‘भारतीय संविधान’ या विषयावर मार्गदर्शन सत्राचे आयोजन करण्यात आले. या सत्रात महाविद्यालयाच्या राज्यशास्त्र विभागाचे प्रमुख प्रा. डॉ. रत्नाकर लक्षटे यांनी विद्यार्थ्यांना सविस्तर मार्गदर्शन केले.

या वेळी प्रा. डॉ. रत्नाकर लक्षटे यांनी भारतीय संविधानाच्या निर्मितीचा इतिहास, संविधान सभेचे कार्य, भारतीय राज्यघटनेची वैशिष्ट्ये, नागरिकांना प्राप्त झालेले मूलभूत अधिकार आणि संविधानाचे महत्त्व यांविषयी सविस्तर विवेचन केले.

भारतीय संविधानामुळे प्रत्येक नागरिकाला व्यक्तिस्वातंत्र्य, मतदानाचा अधिकार, अभिव्यक्तिस्वातंत्र्य तसेच स्त्री-पुरुष समानतेसारखी महत्त्वपूर्ण मूल्ये प्राप्त झाली आहेत. भारतीय लोकशाहीचा भक्कम पाया असलेल्या संविधानानुसार देशातील संसद, न्यायव्यवस्था आणि शासनव्यवस्था कार्यरत आहेत. नागरिकांना आपल्या हक्कांसाठी आवाज उठविण्याचे आणि लोकशाही मार्गाने आंदोलने करण्याचे स्वातंत्र्यही संविधानाने दिले आहे, असे त्यांनी स्पष्ट केले.

भारतीय संविधान हे केवळ कायद्याचे पुस्तक नसून ते देशाच्या लोकशाहीचे, सामाजिक न्यायाचे आणि समतेचे अधिष्ठान आहे. संविधानाचे महत्त्व समजून घेणे, त्याचा नियमित अभ्यास करणे, त्यातील मूल्यांचा आपल्या जीवनात अंगीकार करणे आणि संविधानाचे जतन व संवर्धन करणे हे प्रत्येक भारतीय नागरिकाचे आद्य कर्तव्य आहे, असे प्रतिपादन प्रा. डॉ. रत्नाकर लक्षटे यांनी केले.

विद्यार्थ्यांना भारतीय संविधानाची सखोल माहिती व्हावी आणि स्पर्धा परीक्षांच्या दृष्टीने त्यांचे ज्ञान वृद्धिंगत व्हावे, या उद्देशाने प्रश्नोत्तर व चर्चात्मक पद्धतीने हे मार्गदर्शन सत्र घेण्यात आले. विद्यार्थ्यांनी उत्स्फूर्त सहभाग नोंदवून विविध प्रश्न विचारले. त्यामुळे हे सत्र माहितीपूर्ण व संवादात्मक ठरले.

महाविद्यालयाचे प्राचार्य डॉ. मोहन खताळ, उपप्राचार्य प्रा. डॉ. एम. एम. चमकुडे, उपप्राचार्य प्रा. डॉ. व्ही. जी. शेरीकर आणि पर्यवेक्षक संग्राम पाटील यांच्या मार्गदर्शनाखाली या कार्यक्रमाचे आयोजन करण्यात आले.

या वेळी स्पर्धा परीक्षा मार्गदर्शन केंद्राचे संयोजक प्रा. डॉ. धनराज तुकाराम लझडे, प्रा. तुकाराम लागले, प्रा. दत्ता पाटील, प्रा. सोमनाथ पवार, प्रा. गौतम भालेकर, प्रा. सुनील भुरे, प्रा. खुशाल पाटील, प्रा. संतोष वानोळे, प्रा. रत्नाकर चिद्रावार, प्रा. निकिता ऐन्लावार, प्रा. शोभा वद्येवार, प्रा. शिवानंद सूर्यवंशी तसेच शिक्षकेतर कर्मचारी गंगाधर मामीडवार यांच्यासह महाविद्यालयातील प्राध्यापक व विद्यार्थी मोठ्या संख्येने उपस्थित होते.

स्पर्धा परीक्षा मार्गदर्शन केंद्राच्या या उपक्रमामुळे विद्यार्थ्यांना भारतीय संविधानाची मूलभूत तत्त्वे समजून घेण्यास तसेच स्पर्धा परीक्षांच्या तयारीसाठी महत्त्वपूर्ण ज्ञान प्राप्त करण्यास मदत झाली.

🔴मुख्य संपादक: श्री शहाजी वरखिंडे    मो. 9923072242