🔴 कृषी तंत्र विद्यालयात साहित्यसम्राटचे २३० वे कविसंमेलन रंगले.

🔴 कृषी तंत्र विद्यालयात साहित्यसम्राटचे २३० वे कविसंमेलन रंगले.

जीवनगौरव पुरस्कार सोहळ्यासह विविध विषयांवरील कवितांनी रसिकांची मने जिंकली.

शिवगर्जना न्यूज,
पुणे प्रतिनिधी :

निर्मिती मीडिया सोल्युशन आणि समाज विकास संस्था मांजरी यांच्या संयुक्त विद्यमाने कृषी तंत्र विद्यालय मांजरी फार्म, पुणे येथे जीवनगौरव पुरस्कार सोहळा उत्साहात पार पडला. याच कार्यक्रमात साहित्यसम्राट संस्थेचे २३० वे कविसंमेलन प्राचार्य अमित पवार यांच्या अध्यक्षतेखाली रंगले.

कार्यक्रमाला माजी आमदार गजानन बापू शेवाळे, प्राचार्य अमित पवार, महात्मा फुले विद्यानिकेतन संस्थेच्या स्मिताताई वाघ, रतन माळी, सामाजिक कार्यकर्ते योगेश कुलकर्णी, बाळासाहेब विभुते, मुख्य आयोजक देविदास झुरंगे संपादक शिवराम कांबळे आणि साहित्यसम्राटचे संस्थापक अध्यक्ष विनोद अष्टुळ यांची प्रमुख उपस्थिती होती.

‘फु बाई फु’ फेम सुप्रसिद्ध विनोदी अभिनेते विकास समुद्रे अर्थात दादूस यांना मान्यवरांच्या हस्ते जीवनगौरव पुरस्कार प्रदान करण्यात आला. तसेच विविध क्षेत्रांत उल्लेखनीय कार्य करणाऱ्या समाजसेवकांचाही पुरस्कार देऊन गौरव करण्यात आला.

या कविसंमेलनात शेत, जमीन, शेतकरी, आत्महत्या, वृक्ष, पशुपक्षी, पाणी, जीवन, माणुसकी, प्रेम, विद्रोह आणि प्रबोधन अशा विविध विषयांवर कवींनी आपल्या कविता सादर केल्या. हास्यविनोद, सामाजिक संदेश आणि प्रबोधनाचा सुरेख संगम साधत कवींनी रसिकांची मने जिंकली.

कवी जयद्रथ आखाडे यांनी जीवन आणि वेळेची किंमत अधोरेखित करणारी सामाजिक संदेशाची कविता सादर केली. श्रीकांत वाघ यांनी पावसाळ्यातील निसर्गसौंदर्याचे वर्णन करणाऱ्या कवितेतून रसिकांना निसर्गाच्या सान्निध्यात नेले. गणेश पुंडे यांनी स्वच्छतेचे महत्त्व सांगत स्वच्छता अभियानाचा संदेश दिला.

रेखा दुसाने यांनी ‘निसर्गाची शपथ’ या कवितेतून निसर्गाचे महत्त्व अधोरेखित केले. शांतीलाल ननावरे यांनी श्रीकृष्णावरील प्रेमगीत सादर करून वातावरण भक्तिमय केले. तानाजी शिंदे यांनी ‘माझं सुंदर रान’ या कवितेतून पशुपक्षी आणि निसर्गाचे सुंदर चित्र उभे केले.

संपादक शिवराम कांबळे यांनी वास्तववादी जीवनाचे दर्शन घडविणारी कविता सादर केली. तर साहित्यसम्राटचे संस्थापक अध्यक्ष चतुरस्त्र कवी विनोद अष्टुळ यांनी शाळा-महाविद्यालयीन विद्यार्थ्यांसाठीच्या ‘काव्य बोले काळजाला’ या उपक्रमाची माहिती देत विनोदातून प्रबोधन करणारी वीररसप्रधान ‘सुराज्य’ कविता सादर केली. त्यांच्या प्रभावी सादरीकरणाला सभागृहातून उत्स्फूर्त दाद मिळाली.

कविसंमेलनात कवयित्री रूपाली पाटील, सुनिता घोडके, अरुण घोडके, प्रा. गौरव नेवसे, स्नेहा भोसले, प्रथमेश कोळी, प्रा. अमित पवार तसेच कृषी विद्यापीठातील विद्यार्थी-विद्यार्थिनी आणि प्राध्यापिकांनी उत्स्फूर्तपणे कविता सादर केल्या. त्यांच्या सादरीकरणाला उपस्थितांनी टाळ्यांच्या कडकडाटात दाद दिली.

कार्यक्रमातील सहभागी कवी-कवयित्रींचा अभिनेते विकास समुद्रे ‘दादूस’ यांच्या हस्ते सन्मान करण्यात आला. कार्यक्रमाचे आभार मुख्य आयोजक शिवराम कांबळे यांनी मानले, तर कविसंमेलनाचे बहारदार सूत्रसंचालन चतुरस्त्र कवी विनोद अष्टुळ यांनी केले.

🔴मुख्य संपादक: श्री शहाजी वरखिंडे                   मो. 9923072242