🛑 बळेगाव ते गंगणीबीड कावड यात्रेत हजारो शिवभक्तांचा जयघोष

🔴 बळेगाव ते गंगणीबीड कावड यात्रेत हजारो शिवभक्तांचा जयघोष!

‘हर हर महादेव’, ‘बम बम भोले’च्या घोषणांनी परिसर दुमदुमला; मान्यवरांच्या उपस्थितीत महादेवाचा जलाभिषेक

शिवगर्जना न्यूज,

नायगाव : प्रतिनिधी

शंभो प्रतिष्ठान नायगावच्या वतीने गेल्या चार वर्षांपासून सातत्याने आयोजित करण्यात येणारी बळेगाव ते गंगणीबीड भव्य कावड यात्रा यंदाही हजारो शिवभक्तांच्या उत्स्फूर्त सहभागाने भक्तिमय वातावरणात रविवारी पार पडली. कावड खांद्यावर घेतलेल्या युवकांसह ज्येष्ठ नागरिक आणि परिसरातील विविध गावांतील भाविकांनी ‘हर हर महादेव’, ‘बम बम भोले’चा जयघोष करीत गंगणीबीडकडे मार्गक्रमण केले. त्यामुळे संपूर्ण मार्गावर भक्तीचा जागर आणि शिवनामाचा गजर पाहायला मिळाला.

बळेगाव येथून सकाळी कावड यात्रेला प्रारंभ झाला. हातात कावड आणि मुखी शिवनामाचा जयघोष करीत हजारो भाविक गंगणीबीडच्या दिशेने रवाना झाले. यात्रेतील भाविकांमध्ये मोठा उत्साह दिसून येत होता. पारंपरिक भक्तिभावासोबतच सामाजिक एकतेचा संदेश देणारी ही कावड यात्रा परिसरातील आकर्षण ठरली व घुगराळ्यात भाविकांचे जल्लोषात स्वागत.

कावड यात्रेत सहभागी भाविकांचे घुगराळा येथे खासदार रवींद्र चव्हाण व भाजपचे नेते तथा माजी जिल्हा परिषद सदस्य बालाजीराव बच्चेवार यांच्या हस्ते स्वागत करण्यात आले. यावेळी शंभो प्रतिष्ठानच्या पदाधिकारी व कार्यकर्त्यांचा शाल, श्रीफळ व पुष्पहार देऊन सत्कार करण्यात आला. या स्वागतामुळे कावडधारी भाविकांसह प्रतिष्ठानच्या कार्यकर्त्यांमध्ये उत्साहाचे वातावरण निर्माण झाले.

गंगणीबीड मध्ये महादेवाचा जलाभिषेक

कावड यात्रा गंगणीबीड येथे पोहोचल्यानंतर प्राचीन महादेव मंदिरात धार्मिक विधी पार पडले. भाविकांनी आणलेल्या पवित्र जलाने भगवान महादेवाचा अभिषेक करण्यात आला. खासदार रवींद्र चव्हाण व माजी जिल्हा परिषद सदस्य बालाजीराव बच्चेवार यांच्या उपस्थितीत महादेवाचा जलाभिषेक करण्यात आला. अभिषेकानंतर भाविकांनी महादेवाचे दर्शन घेतले आणि ‘हर हर महादेव’च्या जयघोषात यात्रेची भक्तिमय वातावरणात सांगता झाली.

चार वर्षांपासून धार्मिक परंपरेला बळ

शंभो प्रतिष्ठानच्या वतीने गेल्या चार वर्षांपासून या कावड यात्रेचे आयोजन केले जात आहे. दरवर्षी यात्रेतील भाविकांची संख्या वाढत असून, युवकांसह ज्येष्ठ नागरिक आणि विविध गावांतील शिवभक्त मोठ्या संख्येने सहभागी होत आहेत. या उपक्रमातून धार्मिक श्रद्धेसोबतच सामाजिक एकता आणि बंधुभावाचा संदेश दिला जात असल्याची भावना भाविकांनी व्यक्त केली.

यात्रेच्या यशस्वी आयोजनासाठी शंभो प्रतिष्ठानचे आशिष मामीडवार, विश्वनाथ मेडेवार तसेच भाजपचे कार्यकर्ते माधव कल्याण, राजू बेळगे यांच्यासह प्रतिष्ठानच्या पदाधिकारी व कार्यकर्त्यांनी परिश्रम घेतले.

यावेळी उपनगराध्यक्ष विजय पाटील चव्हाण, माजी शिक्षण सभापती संजय आप्पा बेळगे, नायगाव नगराध्यक्ष प्रतिनिधी संजय पा. चव्हाण, हणमंत पाटील चव्हाण, वसंत मेडेवार,पांडू पाटील चव्हाण, विठ्ठल बेळगे यांच्यासह पत्रकार, व्यापारी, सामाजिक कार्यकर्ते व विविध क्षेत्रांतील मान्यवरांनी यात्रेला भेट देऊन आयोजक व भाविकांना शुभेच्छा दिल्या.

दरवर्षी वाढता सहभाग हेच या कावड यात्रेचे विशेष आकर्षण ठरत असून, बळेगाव ते गंगणीबीड ही धार्मिक परंपरा अधिक दृढ होत असल्याचे चित्र यंदाच्या यात्रेत दिसून आले.

🔴मुख्य संपादक: श्री शहाजी वरखिंडे

मो. 9923072242