🛑 जरांगे पाटलांच्या उपोषणाला नायगावचा एल्गार; तालुका बंद आता ४ सप्टेंबरला!

🛑 जरांगे पाटलांच्या उपोषणाला नायगावचा एल्गार; तालुका बंद आता ४ सप्टेंबरला!

आठवडी बाजारामुळे निर्णयात बदल. 

शिवगर्जना न्यूज,

बाळासाहेब पांडे

नायगाव : संघर्ष योद्धा मनोज जरांगे पाटील यांच्या सुरू असलेल्या आमरण उपोषणास पाठिंबा देण्यासाठी गुरुवार दि. ३ सप्टेंबर रोजी नांदेड जिल्हा बंदची हाक देण्यात आली होती. त्यानुसार नायगाव तालुक्यातही बंदचे आवाहन करण्यात आले होते. मात्र, नायगावचा गुरुवारचा आठवडी बाजार तालुक्यातील ८० ते १०० गावांसाठी महत्त्वाचा असल्याने शेतकरी, व्यापारी आणि सर्वसामान्य नागरिकांची गैरसोय टाळण्यासाठी बंदची तारीख बदलण्याचा निर्णय घेण्यात आला आहे.

नायगावचा गुरुवारचा आठवडी बाजार हा तालुक्यातील प्रमुख बाजारपेठांपैकी एक असून, या बाजारासाठी परिसरातील मोठ्या संख्येने शेतकरी व नागरिक नायगावात येतात. आगामी गोकुळाष्टमी तसेच शेतकऱ्यांचा पोळा सण तोंडावर असल्याने बाजाराचे महत्त्व आणखी वाढले आहे. अशा परिस्थितीत गुरुवारी बंद पाळल्यास शेतकरी, व्यापारी तसेच नागरिकांची मोठी गैरसोय होण्याची शक्यता होती.

सदर बाब लक्षात घेऊन ३ सप्टेंबर रोजी होणारा नायगाव तालुका बंद आता शुक्रवार, दि. ४ सप्टेंबर २०२६ रोजी पाळण्यात येणार आहे. या दिवशी तालुक्यातील व्यापारी प्रतिष्ठाने व दुकाने बंद ठेवून मनोज जरांगे पाटील यांच्या आंदोलनाला ठाम आणि एकजुटीने पाठिंबा देण्यात येणार असल्याचे सकल मराठा समाजाच्या वतीने सांगण्यात आले.

स्वयंस्फूर्तीने सहभागी होण्याचे आवाहन

नायगाव तालुक्यातील सर्व व्यापारी, दुकानदार, शेतकरी, युवक, सामाजिक कार्यकर्ते तसेच नागरिकांनी शुक्रवार, दि. ४ सप्टेंबर रोजी स्वयंस्फूर्तीने बंदमध्ये सहभागी होऊन सहकार्य करावे, असे आवाहन सकल मराठा समाजाच्या वतीने करण्यात आले आहे.

“एकजूट दाखवूया, न्यायाच्या लढ्याला बळ देऊया!” असा निर्धार व्यक्त करत मराठा समाजाच्या आंदोलनाला पाठिंबा देण्यासाठी तालुक्यातील नागरिकांनी मोठ्या संख्येने सहभागी व्हावे, असे आवाहन करण्यात आले आहे.

— सकल मराठा समाज, नायगाव तालुका