🛑 नरसीत मोबाईल टॉवरला नागरिकांचा तीव्र विरोध; प्रशासनाविरोधात संताप.

🛑 नरसीत मोबाईल टॉवरला नागरिकांचा तीव्र विरोध; प्रशासना विरोधात संताप.

शिवगर्जना न्यूज,

नायगाव : बालासाहेब पांडे

नायगाव : नरसी जुने गाव ग्रामपंचायत परिसरातील वस्तीमध्ये प्रस्तावित जि.ओ./एअरटेल मोबाईल टॉवरला नागरिकांनी तीव्र विरोध दर्शविला आहे. यापूर्वीही याच परिसरात मोबाईल टॉवर उभारण्यात आल्याचा आरोप करत, आता पुन्हा टॉवर उभारणीचा प्रयत्न सुरू असल्याने नागरिकांमध्ये संतापाची लाट निर्माण झाली आहे.

जिल्हा परिषद शाळेजवळ मोठ्या प्रमाणात वस्ती असून, परिसरात लहान मुले, वृद्ध आणि कुटुंबे वास्तव्यास आहेत. त्यामुळे प्रस्तावित टॉवरमुळे आरोग्य व सुरक्षिततेचा प्रश्न निर्माण होऊ शकतो, अशी भीती नागरिकांनी व्यक्त केली आहे. टॉवर उभारणीसाठी आवश्यक शासकीय परवानग्या, तांत्रिक निकष, संरचनात्मक सुरक्षितता आणि दूरसंचार विकिरणासंदर्भातील निर्धारित मानकांचे पालन झाले आहे का, याची प्रशासनाने तपासणी करावी, अशी मागणी करण्यात आली आहे.

यापूर्वी टॉवर उभारणीवेळी एका स्थानिक राष्ट्रवादी काँग्रेसच्या पुढाऱ्याच्या पुढाकाराचा वापर झाल्याचा आरोप रहिवाशांनी केला आहे. आता पुन्हा त्याच व्यक्तीच्या पुढाकारातून टॉवर उभारणीची कार्यवाही सुरू असल्याचे नागरिकांचे म्हणणे आहे. त्यामुळे ‘नागरिकांच्या हरकती डावलून टॉवर कोणाच्या हितासाठी?’ असा सवाल उपस्थित केला जात आहे.

तहसीलदारांकडे लेखी हरकत

भारत बापूराव कोरे, श्यामसुंदर बोधने, रमेश शंकरराव, रमाकांत फुलारी, मारोती महाजन, लक्ष्मण बोधने, सय्यद इशरद हुसेनसाब, सय्यद अजीम हुसेनसाब, सय्यद आदम हुसेनसाब आणि सय्यद ईसाक हुसेनसाब यांच्यासह परिसरातील नागरिकांनी तहसीलदारांकडे लेखी हरकत नोंदवली आहे. नागरिकांच्या हरकतींची दखल न घेता टॉवरला परवानगी दिल्यास लोकशाही मार्गाने तीव्र उपोषण करण्याचा इशाराही देण्यात आला आहे.

प्रशासनाने तातडीने स्थळपाहणी करून टॉवर उभारणीसंदर्भातील सर्व कागदपत्रे व परवानग्यांची पडताळणी करावी आणि चौकशी पूर्ण होईपर्यंत प्रस्तावित टॉवरची कार्यवाही थांबवावी, अशी मागणी नागरिकांनी केली आहे.

🔴मुख्य संपादक: श्री शहाजी वरखिंडे

मो. 9923072242